Ethel Ncube
“ANGILAZWELO emuntwini oyenzela omunye okubi.
Ngingathola ukuthi ngakini ukhona oligangelayo, ngiyakulungisa lokho nge-Back to Sender.”
La ngamazwi oMphurofethi uThwasa loDumo osezakhele ibizo ngokwelapha ngokwenkonzo langokwedlozi, oveze ukuba uyenelisa ukuphindisela nxa ugangelwe.
UThwasa loDumo, ibizo lakhe lokuzalwa enguMusawenkosi Vundla uvakatshele emahofisini ephephandaba likazulu ngoLwesithathu kuyonale iviki lapho achaze khona kabanzi ngomsebenzi wakhe wokwelapha abantu.
Ubike ukuba loba eselapha, ulakho njalo ukuthi ancedise lapho nxa kuthe kwaba labantu abenzela abanye okubi.
Ekhuluma loMthunywa uThwasa loDumo uchaze obala ukuthi katshayi inja efihla umphini nxa ehlangane lobubi.
“Ngiyayicacada indlubu ekhasini ngikhangelisise isimo okiso ngibisele kumnikazi. Kengithi usemdenini bayakugangela ukuthi ufe kumbe ulimale mina ngibisela kunjalo njengalokhu akade bekufisela khona.
Ngiyenza i-Back to Sender.
Angibuyeli emuva, ngitshaya kunjalo kuyetshaya umnikazi,” kubika uThwasa loDumo.
Uqhubekele phambili echaza ukuba omakhwapheni abathatha amadoda abanikazi uyaqeda ngabo.
“Ngenza okunengi.
Ungeza kimi uthi bakuthathele indoda yakho ngiyahlola emoyeni ukuthi ngempela umkakho uhambile.
Ngiqeda lapho ngiyalungisa indoda ibuyele kumnikazi, ngilungisa esinye isichitho esingamanga kuqonda, umuntu abuyele emuntwini wakhe.
Sondelani eduze libone.”
Kumaviki amabili adluleyo, uMthunywa waloba udaba ngeminye imisebenzi kaThwasa loDumo lapho aveza ukuthi waqala njani.
“Ngaqala lumsebenzi ngomnyaka ka2016.
Ngiphathisa kakhulu labo abangatholi inzalo, abalesifo semvukuzane, abafuna ukuphendukisa izithandwa zabo, abalungisa imizi yabo, abafuna ukuqinisa amabhizimusi abo labafuna ukuphendukisa impahla etshontshiweyo.
Banengi abangazwisisiyo ukuthi ngisebenza njani. Kodwa kulula nje, ngisebenzisa isiNtu ngiphinde ngisebenzise okweSonto.
“Umuntu engabuya elohlupho ngiyamthandazela ukuze ngibone uhlupho lwakhe.
Ngemva kokumthandazela ngiyatshelwa ukuba kumele ngisebenzise izihlahla zesintu kumbe imithandazo.
Engikuchazayo yikuthi mina ekuthandazeni kwami yikho lapho engitshengiswa khona ukuthi usizo lomuntu lusesintwini kumbe emkhulekweni.”
Wabika ukuba uyelapha esebenzisa inkundla zokuxhumana ezifana le-WhatsApp.
“Loba ukhatshana okunganani olwami usizo uyaluthola, okwenzayo yikungena kuWhatsApp uthumele ibizo lesibongo kumbe lomfanekiso wakho, nxa kuvuma ngemva kwalokho sengithandaza sengikubikela inkinga zakho lokuthi ungasizakala njani.
“Loba ungaphi komhlaba sondela kimi sincedisane, inkinga lezo ezikusindayo ubone inguquko lempumela empilweni. Ungesabeli khatshana, buya eduzane ngikusize.
Mina ngihlala eVictoria Falls kodwa ngiyahamba indawo ezitshiyeneyo zelizwe langaphandle kwelizwe.
Ngihlala ngizimisele ukusiza abantu,” nguThwasa loDumo lo.
UThwasa loDumo ukhangelelwe ukuncedisa abantu koBulawayo lamuhla, kuthi ngoLwesihlanu uzabe esedolobheni leGwanda acine eSilobela ngoMgqibelo.