Brandon Moyo
U-KEEGAN Shutt, umdlali we-golf wakuleli, wenze kuhle eqeda kunombolo yesibili kumncimtiswano we-Africa Amateur Championship, obuse Leopard Creek eSouth Africa ngoMgqibelo.
Umdlali lo oleminyaka engu-18 yokuzalwa uqede umncintiswano, ehlukane lentshantshu uBryan Newman weSouth Africa, ngemiklomelo emibili kuphela.
U-Shutt, uqede eku-six-under-par 282. UNewman, ubele 8-under-par 280.
Esigabeni sokucina somncintiswano, uShutt ubesendaweni yesihlanu, kulandela ukudlala ngendlela encomekayo kusigaba sesithathu lapho atshaye khona i-six-under-par-66. Ngaleso sikhathi, ubelandela u-Newman ngama-strokes amane.
Ekhuluma ngemva komncintiswano, u-Shutt uvumile ukuthi uzizwa ephoxekile ngokudlala kwakhe kwezinye izigaba zomncintiswano. Loba kunjalo uthe uyasuthiseka ngokudlala kwakhe.
“Ngidanile kancane. Ngicabanga ukuthi yilapho engilahleke kusigaba sesibili. Ngijabule kakhulu ngendlela engilwe ngayo. Ngidlale i-golf enhle kakhulu,” kutsho umdlali lo.
Utshayele ihlombe uNewman ngokuphumelela kwakhe.
“Wenze kuhle uBryan. Ngazama ukumqinela kwehlula. Wenelise ukuwubamba umdlalo waqeda ngamandla.”
Omunye umdlali wakuleli uTanaka Chatora uqede ekunombolo yetshumi lasithupha enelise i-8-over-par-296.
UMichael Wallace uqede ekunombolo yamatshumi amabili lasitshiya galombili eku- 19-over-par 307. UDarlington Chikanyambidze, ubekunombolo yamatshumi amabili lasitshiya galolunye ele 20-over-par 308.
I-Africa Amateur Championship kunye le-Africa Amateur Women’s Invitational, ethuthukiswe yi-R&A, ihlose ukukhulisa ithalentela lokunikeza abadlali be-golf amathuba okubonakala kunkundla zaphezulu.
