uMthunywa
SIYADIBANA njalo bafundi kule iviki yokuvulwa kwezikolo, ngithemba livule kuhle ithemu yesibili.
Nanzi impendulo obukhangelelwe ukuphuma lazo kumsebenzi wakuviki ephelileyo:
(a) igwala
(b) ukuzimuka
(c) amanga
(d) inkosi
(e) umngane
(f) ukutshisa
Kuliviki bafundi sizaxoxisana ngemikhuhlane eyehlukeneyo. Eminye imikhuhlane sesize singasayazi lamagama, sesikhangela kakhulu le eqanjwa esilungwini kakhulu.
Khathesi kuyisikhathi somqando yikho okuvuka imikhuhlane eyehlukeneyo ufice abantu bekhala ngobuhlungu bomzimba bengazi ukuthi vele okubakhathazayo kuyini.
Akutsho ukuthi imikhuhlane le ibizwa njani ngesiNtu.
Isibonelo: Uselento ehamba esiswini bamfakela ekudleni, sithi ulesidliso.
1. Usane lubulawa ngumkhuhlane wamehlo sithi ……..
2. Ubulawa yizilonda ezilapha okuhlangana khona izitho zomzimba phakathi kweminwe laphakathi kwamazwane, ziyaluma uyenwaya sithi …….
3. Inyawo zakhe zibuhlungu zilomkhuhlane ozenza zihlabe sithi ……..
4. Umntwana ulomzimba otshisa kubi, uqubukile, uyakhwehlela, amehlo abomvu ………..
5. Ixhegu lilezandla eziqhuqhayo …………
Sizahlangana njalo kuviki ezayo zihlolana ukuze sibone ukuba siyasazi na isiNtu sethu.
Bafundi thumelani impendulo zenu kunombolo lezi 0773675473 kumbe ku-0778520007 nge WhatsApp loba ngeSms. Ufake ibizo lesibongo sakho, ukuthi ukuliphi ibanga lokuthi ufunda kusiphi isikolo. Thumela njalo lomfanekiso wakho. Kuphephandaba lakuviki ezayo sizafaka impendulo kanye lezithombe zenu.
