uMthunywa
SIYADIBANA njalo bafundi kule iviki. Ikhefu selisiya emaphethelweni, ngithemba selenzile imisebenzi elayinikwa ngababalisi benu yesikhathi sekhefu.
Nanzi impendulo obukhangelelwe ukuphuma lazo kumsebenzi wakuviki ephelileyo:
1. Icholo – zinwele ezelukwe zaba ngumphotshongo ekhanda.
2. (i) Isicholo – yisiphetho sophahla lwendlu yesintu lapho okuhlangana khona intungo.
(ii) Zinwele ezisala phezu kwekhanda labafana ngemva kokugela.
3. Umfasimbi – yinkungu ebangelwa ngamanzi ayabe esantuthu.
4. (i) Umthala – yingxenye yolusu eqathanyana emhlotshana futhi.
(ii) Ngumzila wezinkanyezi oquma isibhakabhaka obonakala entwasa.
5. Umthangala – yisakhiwo samatshe esakhiwa kungeladaka ukuthi sivimbele inyamazana kumbe izitha.
6. Inkelo – zintanga zesithelo somganu kumbe umkhuna ezigqulwayo kudliwe amazambane aphakathi.
7. Iwosana – ngumuntu okukholwa ukuthi uledlozi lokugidela izulu.
8. Amahlwayi – yizigqizo ezigqizwa embaleni nxa umuntu egida imigido yesintu.
Kule iviki ngizalipha umsebenzi wamagama aphikisanayo.
Amagama aphikisanayo.
(a) iqhawe …. (b) ukuzaca … (c) iqiniso … (d) isichaka … ( e) isitha … (f) umqando …
Sizahlangana njalo kuviki ezayo sihlolana ukuze sibone ukuba siyasazi na isiNtu sethu.
Bafundi thumelani impendulo zenu kunombolo lezi 0773675473 kumbe ku-0776710190 nge WhatsApp loba nge-sms. Ufake ibizo lesibongo sakho, ukuthi ukuliphi ibanga lokuthi ufunda kusiphi isikolo. Thumela njalo lomfanekiso wakho. Kuphephandaba lakuviki ezayo sizafaka impendulo kanye lezithombe zenu.
