YiNtatheli kaMthunywa
UKAPUTENI wamaWarriors, uMarshall Munetsi uthe kumele baphangise ukujwayela umqondo womqeqetshi uMichael Nees njengoba behlose ukuthi umkhankaso wabo we-Afcon ka-2025 uqale kuhle.
IZimbabwe iqala ukudlala ngoLwesihlanu leKenya andubana idibane leCameroon ngemva kwamalanga amane. Yonke imidlalo le izadlalelwa enkundleni yeMandela National Stadium e-Uganda.
Imidlalo le ise-Uganda ngoba elizweni leKenya and laseZimbabwe akulankundla ezivunyelwa yinhlanganiso yeConfederation of African Football (Caf).
UMunetsi uthe kumidlalo le, kumele njengabadlali bafunde indlela uNees asebenza ngayo.
uMichael Nees
“Silabadlali abambalwa abalimeleyo. Abanye abenelisanga ukubuya, kodwa loba kunjalo sisebenza nzima ukuqinisekisa ukuthi umkhankaso wethu siwuqala kuhle, iKenya liqembu elingelula ukudlala lalo kodwa siyakwazi okumele sikwenze. Sizama ukulalela umqeqetshi njengoba emutsha.
“Sifuna ukufunda okunengi kuye ngokuphangisa. Sesimzwisisa njalo lombono wakhe siyawuthola. Singabadlali lathi siyazwana ngoba sesidonse isikhathi sidlala sonke. Kunguqu, yonke into igxile kumpumela,” kutsho uMunetsi.
Kusenjalo, sekuvele ukuthi kulimele abadlali ababalisa uTino Kadewere lemvimbi uBrandon Galloway, okubikwa bazabe bengekho emdlalweni.
Kuqula leKenya, kungenzeka kungadlali ukaputeni uMichael Olunga, Collins Sichenje lo-Ian Otieno.
IZimbabwe le Kenya sezidlale kane kusukela ngo-2008. AmaWarriors kazake anqobe. Kumdlalo wazo odluleyo, iHarambe Stars yanqoba 2-0.
IZimbabwe izadlala leNamibia mhlaka 7 Mfumfu, enkundleni ezabikwa.
