YiNtatheli kaMthunywa
IDOLOBHO lakoBulawayo selilenani labantu abanengi asebefile bebulawa yiCovid-19 kulandela ukufa kwendoda eleminyaka engu-54 ebingumaqhuzu eZimbabwe Revenue Authority (Zimra).
KoBulawayo sokulabantu abane asebefile, iHarare yona ilabantu abathathu asebebulewe lubhubhane lweCovid-19.
Kulandela ukufa kukamaqhuzu weZimra, uThabani Sibanda ngeSonto, amahofisi eMhlahlandlela asevaliwe okwesikhatshana ukuze kufafazwe umuthi wokubulala amagcikwane.
Kusitatimende esikhutshwe lugatsha olubona ngezeMpilakahle kanye lokondliwa kuhle kwabantwana kubikwa kuleli sekulabantu abangu-734 asebeleCovid-19. Phakathi kwabo abangu-197 sebesilile.
UMqondisi wezempilakahle koBulawayo uDokotela Welcome Mlilo uthe koBulawayo sokulabantu abane asebebulewe yiCovid-19.
“Kuliqiniso ukuthi kulomuntu wesine osebulewe yiCovid-19 koBulawayo ngemva kokufa kwendoda eleminyaka engu-54 kwesinye isibhedlela ngempelaviki.
“Indlela zokuvikela iCovid-19 lokhu zingakaguquki. Siqhubekela phambili sikhuthaza abantu ukuhlanzeka ikakhulu ukugeza izandla, ukutshiyelana umkhandlo kanye lokugqoka izayeke nxa abantu besemphakathini,” kuchaza uDkt Mlilo.