uMthunywa
UMQEQETSHI we-SuperSport United uKaitano Tembo ophuma eZimbabwe, usetshengise impawu zokuphosa ithawulo kumncintiswano wesicoco seligi.
Kulandela inkulumo yakhe kuliviki, inhloko yabaqeqetshi baleliqembu uTembo ubebonakala ngitsho lasebusweni ukuthi uphatheke kabi iqembu lakhe litshaywa yiStellenbosch FC ngoLwesihlanu olwedluleyo.
ISuperSport ingelinye lamaqembu abelithitshwe ukuthi azakulwa kuze kuphele isizini, ibesethubeni lokuthola isicoco esihamba lomvuzo we-R15 million.
Lokhu bekudalwa yindlela leliqembu ebeliqoqa ngayo imklomelo ikakhulukazi ekupheleni kuka-2019.
Kukhona okwenzekileyo ngesikhathi sekhefu leKhisimusi okubukeka kuhlakaze yonke into ebeyenziwa nguTembo labadlali bakhe, inengi labo elidlalela amaqembu esizwe.
Lamanje iSuperSport isahlezi endaweni yesine ku-logu kodwa yiyo esidlale kanengi ukwedlula wonke.
Lokhu kufakazelwa yikuthi iSuperSport isidlale ka-22 kulisizini kodwa ingcono ngemklomelo owodwa kuBidvest Wits esendaweni yesihlanu kanti yona isadlale ka-17 kuphela.
“Angikholwa ukuthi kusifanele ukuthi sivule imilomo yethu, sikhulume ngombango wesicoco ngoba okwamanje siyehluleka ukwenza lokhu okungasifaka embangweni. Indlela yokungena kumbango yikunqoba imidlalo okuyinto esingayenziyo thina kulezi insuku. Nxa uzakhangelisisa kahle, imidlalo yethu emibili edluleyo, sitshaywe nge1-0 kuyo yomibili.
“Nxa sitshaywa kanje, kutshengisa ukuthi silenkinga. Iqiniso lapha, mithathu imidlalo ilandelana singalitholi amabhola,” kutsho uTembo.
Okukhalisa kakhulu lumqeqetshi ukuthi uyazi ukuthi ubophele abadlali abalokhakhayi oluqinile futhi njalo bayihlelela ngendlela imidlalo kodwa bashaywe ngento abebeyihlelele.
“Angazi ngingathini kodwa kuyaphoxa ukuthi utshaywe ngento okade uyiqeqetsha isonto lonke.
“ISuperSport igcwele abadlali abamela amazwe abo okuyizinkomba yokuqina kwayo kodwa kulezi zinsuku akuvumi khona.
“Angikholwa ukuthi singabalwa embangweni ngoba thina senza okuhlukene kakhulu kulalokhu okudingekayo ukuze ubalwe. Siyehluleka ukunqoba imidlalo.” — Ubulembu
