uMthunywa
Nkosilathi Sibanda
SELIFEZEKILE iphupho likamuyi uNdumiso Gumede lokuvuselela indawo ebizwa ngokuthi yiClubhouse nanko iqembu leHighlanders libika lizavula lindawo lamuhla.
UGumede owabangumaqhuzu, waphinda waba ngumongameli weHighlanders, wayeyithanda indawo yokuzithokozisa le njalo kuyaziwa ukuthi wayehlezi ekhuluma ngenhlelo zokuthi kumele ivuselelwe.
Ngokunjalo, isikhulumi seqembu leHighlanders uNozibelo Maphosa usebike ukuba kuzatshisa phansi kuqande phezulu lamuhla ngokuvulwa kwendawo yabo yokuzithokozisa iClubhouse.
Isakhiwo lesi esikoBulawayo, siphansi kwempahla yeHighlanders njalo isetshenziswa yindlamanzi labo bonke abathandi baleliqembu abadinga ukuchitha isizungu ngomculo, ukudla lokubukela inguqu.
Akula elinye iqembu elilesakhiwo esinje koBulawayo.
IClubhouse ibivaliwe kusukela ngoMpalakazi, kuvuselelwa isimo sayo. UMaphosa ubikele intatheli kaMthunywa ukuba abantu kabasoze babe lenkani bebona ubuhle lobukhazikhazi abazabuthola kulindawo.
iHighlanders Clubhouse
Iphephandaba likazulu likubika ngokugcweleyo ukuba iHighlanders ibambane losaziwayo kwezebhizimusi lokuzithokozisa koBulawayo uPhathisani Nkomo.
UNkomo waziwa ngendawo zakhe zobunandi ezisekelwa linengi labantu koNtuthu.
Ukuvalwa kwezinyanga ezimbili kweqembu leHighlanders Clubhouse ukuze kulungiswe izinto ezinkulu kukhangelelwe ukuthi kulindwe, njalo inkundla izavulwa kusasa.
Ukuvulwa kweClubhouse kuze ngesikhathi esifaneleyo nanko iHighlanders idlala kumdlalo wayo wakuqala oweligi yeCastle Lager eBarbourfields ngeSonto.
Ngendlela okwakhiwe ngayo kakutsha, uMaphosa uthe abantu bazenelisa ukuqhuba njalo imcimbi yabo.
“Sinxusa amalunga ethu, abalandeli, abathengi abajwayelekileyo kunye labathandi bobumnandi eClubhouse yethu esanda kulungiswa,” kutsho uMaphosa.
“IClubhouse yethu isinhle kakhulu okokuthi izancintisana lezinye ezikuzinga laphezulu edolobheni.”
“Ngaphandle kokuba yindawo yokukholisisa abantu, iClubhouse ikhangelelwe ukuthi kusiyaphela umnyaka ibe isilungiswe inkundla lapho okuzalolongela khona leqembu elikhulu leHighlanders.
Kumaviki ambalwa adluleyo, umaqhuzu weHighlanders uRonald Moyo uthe sebeqalile iphurojekithi yokulima kulandela ukuphiwa kwabo i-green house lapho okuzahlanyelwa khona imbhida lezinye izilimo.
UMoyo uthe bacabanga ukulima egcekeni leClubhouse ngoba bephiwe impahla ebalisa imtshina yesibholane samanzi, impompi lokunye okuzenza kubelula ukuqhuba inhlelo zabo.
Inhloso yemisebenzi eseClubhouse ngeyokudingela iqembu imali.
