uMthunywa
NGEMVA kokuphunyukwa yilowo owaduma kuKaizer Chiefs, uKnowledge Musona, umqeqetshi weMamelodi Sundowns uPitso Mosimane akasaphumeli obala ngenhlelo zabo zokufuna umgadli lo.
Phambilini uMosimane ubegeqa amagula ngokudinga umgadli ozabasiza ekuhlohleni amabhola waze waveza ukuthi lowo mgadli uyaziwa kuleli nxa ulendumela yokudlala eAfrica.
Kucine kuvelile ukuthi ubekhuluma ngoMusona obelizwa ngendaba ijesi eqenjini leBelgium i-Anderlechet.
Ngempelaviki edluleyo umgadli lo kumenyezelwe ukuthi usesayiniswe yiKAS Eupen ye-eBelgium ebikade e
imbolekile kuze kuphele isizini.
UMosimane uvumile ukuthi bebemfuna umgadli lo odabuka eZimbabwe.
“UKnowledge yebo siyavuma besimfuna kodwa ukhethe ukujoyina uhlelo lwe-Aspire. Ngeke siqophisane ngemali labaseQatar kodwa kulungile. Sithemba ukuthi uAffonso Mauricio uzabuya,” kutsho uMosimane.
I-Eupen ixhaswe eQatar ngabe-Aspire Academy.
UMauricio akhuluma ngaye usayiniswe ekuqaleni kwesizini kanti uyihlohlele amabhola amqoka iSundowns, ngaphambi kokuthi alimale. Amanye awo asize iqembu ukuthi lidle isicoco seTelkom Knockout.
Ube esebuza intatheli ukuthi yona ngabe icabanga ukuthi bayadinga ukusayinisa abadlali?
UMusona akusiyena kuphela umdlali obegaqelwe yiSundowns njengoba ihlulekile lokuthola uAubrey Modiba weSuperSport United.
“Senze okufaneleyo safaka isicelo. Ungumdlali omuhle ebesingathanda ukuba laye kodwa-ke akukho ezandleni zethu uma yena ekhethe ukuvuselela inkontileka leqembu lakhe,” kutsho uMosimane.
ISundowns ibika njalo ukuthi isasekhona embangweni weligi.
“Ngithanda ukukhuluma ngeWits ngoba sisemjahweni ofanayo layo. Abaphumule. Siya eLuanda, ngicabanga ukuthi bona bazobe besekhaya kulokhu njengoba bephuma e-Egypt.
“Kunzima ukugxila emdlalweni weligi ube ubhekene lokuhlala endaweni yokuqala kuChampions League. Kukhona leTelkom leNedbank Cup lapho sizophinda sibhekane leSuperSport futhi. Luselude ukhalo. UMeyi usakude kusengenzeka loba yini. Sisangaphinde siwalahle amaphuzu. Cabanga ukuthi asiwalahlanga kuPirates lakuWits kabili. Lokhu kutsho ukuthi lento isavulelekile.”
Uthe mhlawumbe iWits izakwazi ukuyiphazamisa iChiefs njengoba besazodlala kabili.
“Mhlawumbe uHunt uzabaphazamisa njengoba besazodlala kabili. Basazodlala lePirates lathi. Ngakho lento isavulekile kodwa-ke baku-honeymoon. Kumele sibahloniphe,” kutsho lumqeqetshi.
