uMthunywa
Brandon Moyo
AKULULA ukuthi kube lomdlali osuka eNgilandi akhethe ukuzodlala kuleli, kodwa uGary Ballance ukwenzile.
Ngokuza kwakhe, amaChevrons aselethemba lokuthi asezathola inhlonipho kumdlalo wohlobo lwe-Test.
Umdlali wekhilikithi lo ulethe “ibhalansi” kuqembu lama Chevrons ngemva kokuthola ama-runs alikhulu kumdlalo wakhe wokuqala weTest ekuleliqembu.
Wenze lokhu ngoLwesibili kumdlalo wamaChevrons leWest Indies enkundleni yeQueens Sports Club koBulawayo.
uGary Ballance
UBallance, oyisizalwane seZimbabwe, wayedlalela iqembu leNgilandi kodwa ekupheleni komnyaka odluleyo wacabanga kutsha, wakhetha ukuthi aphindele ekhaya ancedise elakibo. Lakanye ukufika kwakhe kudale inkalakatha yenguquko.
UBallance uthole ama-runs angu-137 engaphumanga ngesikhathi iZimbabwe iphenduka emdlalweni ngelanga lesine.
UBallance ube ngumdlali wesibili kusukela ekusungulweni komdlalo wekhilikithi ukuthola ama-runs alikhulu kumazwe amabili ehlukeneyo. Umdlali lo watshaya ama-runs alikhulu kane edlalela iNgilandi ngemva kokuba abuye azodlalela iZimbabwe.
AmaChevrons aqede ilanga langoLwesibili esephendukile emdlalweni. Akula obecabange ukuthi amaChevrons angakwenza lokhu kumdlalo wekhilikithi yeTest. Ukudlala leWest Indies bekusethusa, nanko lenengi labasekeli labacubunguli bomdlalo bebesithi iqembu lizadliwa ngendlela eyangisayo.
UBallance uke wedlula isikhathi lapho obesekuthiwa usephelelwe ngumphako. Bakhona abakade besola ukuthi kungani ekhathe ukuzodlalela iZimbabwe. Kodwa ngenxa yokukholwa ngumqeqetshi wama-Chevrons uDave Houghton, utshengise ukuthi usaselawo umdlalo.
Kumdlalo wangoLwesibili, uBallance uqinise iqembu esetshintshana loBrandon Mavuta, otshaye ingxenye yekhulu ngemva kokuphenduka kwakhe eqenjini.
UMavuta ubeseleminyaka emihlanu engekho. U-Innocent Kaia laye uthole ingxenye yekhulu kumdlalo wakhe wokuqala weTest.
Ekupheleni komdlalo, uBallance uthe uyaziqhenya kakhulu ngokutshaya ikhulu lama-runs edlalela ilizwe lakhe lokuzalwa.
“Ngijabule kakhulu,” kutsho lumdlali.
IZimbabwe le West Indies zizatshayisana futhi kumdlalo wesibili weTest ozaqala mhlaka 12 Nhlolanja eQueens Sports Club njalo.
