uMthunywa
Nkosilathi Sibanda
INKOKHELI zeqembu leBulawayo Chiefs ziyajabula ngokwenelisa ukuthola ingcitshi yemvimbi eyayiku-Chicken Inn u-Ian Nekati.
Kuyabonakala ukuthi kuthe bemthola lumdlali kwatshaywa umpululu emahofisini nanko iChiefs ayizange iphuze ukukubeka emphakathini lokhu.
Okwenza iBulawayo Chiefs ithabe kanje yikuthi aziboni ngaso linye leChicken Inn loba zingomakhelwane.
Iphephandaba likazulu likuzwe ngokugcweleyo ukuthi u-Nekati ubesengumdlali ongelaqembu kulandela ukuvalwa kwewindi ngoNtulikazi. Isizatho sokuchithwa yiChicken Inn yikuthi lumdlali wakhokhela ukukhalala umsebenzi okwenziwa ngabadlali baleliqembu ngesizini edluleyo. Lokho kubikwa akuzange kuthabise iziphathamandla zeqembu ezavumelana ukuthi angaphenduki eqenjini.
IBulawayo Chiefs ihle yeqela phezulu isizwa ukuthi u-Nekati isingamthenga.
Isikhulumi salithimu uThulani “Javas” Sibanda utshele iphephandaba likazulu ngoLwesibili emini ukuthi sebemthethe uNekati.
“Yebo lumdlali u-Ian Nekati usethengwe yiBulawayo Chiefs,” kutsho uSibanda.
USibanda kazange athande ukutsho ngemali abayikhuphe kulumdlalo.
Kusenjalo ivukile impi phakathi kweChicken Inn leBulawayo Chiefs kulandela ukuthengwa kuka-Nekati. Ivukele ebulenjini buka-Twitter lapho iBulawayo Chiefs ebike yathi: “Sethula u-Ian Nekati ozoqinisa imvimbi zethu.”
IBulawayo Chiefs iphinde yabiza uMandlenkosi Gasela umdlali olethalenta lokutshibilika esiswini senkundla.
UGasela uzakhwezela umfutho enzikini yeqembu encedisana lo-Arthur Diego, Lucky Killa loDominic Jachira.
Iqembu leli liqhubekela phambili lisedlula amanye okubizwa ngokuthi makhulu. Ukuguqula indlela iqembu elikhokhelwa ngayo sekwenze kwabalula ukuthi loba iCovid-19 ivale imidlalo, iBulawayo Chiefs iyathola imali kumbaxa ezehlukeneyo ezibalisa isitolo sayo sempahla.
IBulawayo Chiefs yilo lodwa iqembu elilamabhizimusi nanko ngenyanga ezedluleyo ibike ukuba isipheka inamunede ebizwa ngokuthi yi- eNinja Energy Drink.
