uMthunywa
Ethel Ncube
KULOMNTWANA weBinga osesehluleka ukuya esikolo nanko phela kulempala emxotshanisayo mihla lemihla nxa ethi uya esikolo osokwenza abangakibo bacabangele ukuthi kukhona umuntu olesandla kulokhu.
Ngokukhuluma kwabantu kukhanya limpala ixotshanisa lumntwana yedwa itshiya abanye bakhe njalo lokhu sokulamaviki ambalwa kusenzakala. Abanye labo bathi bacabangela ukuthi iyabe ifuna ukumbhinya ngoba kuthwa yake yamfica, wathi esewele phansi yaqala ukumkhotha emzimbeni wonke andubana imtshiye.
Isiga lesi sivele emavikini amathathu adluleyo lapho umntwana lo okubanga lakuqala kumfundo yaphezulu aqale ukwala ukuya esikolo ngoba esithi kulempala ehlala imxotshanisa agijime aze awele phansi.
Ekhuluma loMthunywa uMnumzana Elias Mudimba uveze ukuba njengezakhamizi kabalankani ngesiga lesi.
“Ngokwazi kwami akulampala engaxotshanisa umuntu njalo ihlale ixotshanisa yena yedwa. Kukhona okutshaya amanzi lapha, ngabona kulomuntu olesandla kulokhu.
“Umntwana waqala esesaba ukukhuluma ngokwakusenzakala kungakho-ke wayehlala esithi uyagula. Lokhu kwasikhathaza njengoba eyinkazana sasesicabangela ukuthi mhlawumbe umntwana usezithwele kukanti ayisikho lokhu.
“Kuthe ngelinye ilanga sathi sisemasimini sabona umntwana lo egijima okuzwayo ehlaba umkhosi ngasuka ngamlandela ngisithi kame wabaleka waze wayakuwa ngakibo yikho afika lelolanga wakhuluma ukuba uhlala egijinyiswa yimpala yikho engayi esikolo,” kubika uMnu Mudimba.
Uqhubekele phambili echaza ukuba abantu bakule indawo sebelomkhuba omubi wokusebenzisa izinyamazana ekwenzeni imithanithani yabo yokuloya.
“Uyabona linyamazana asidingi kuyizingela, umnikazi uzazibonela yedwa, asidingi kumlanda udlala kubi. Ungazake wekelise omunye umntwana isikolo ngemithi. Impala le uthi ibithi ingamthola alwisane layo aze acine esiwa phansi imkhothe umzimba wonke.
“Lapho ngitsho okunje kulomutsho omkhulu, akungeke kuhlalwe phansi nje kungani akulalutho akuvumi,” kubika uMnu Mudimba.
Ekhuluma loMthunywa uyise womntwana ogijinyiswa yimpala uMnumzana Johnson Shoko uchaze ukuba lokhu okwenzakalayo kubadidanisa amakhanda.
“Ukuthi ngingatshona ngiqambela inyamazana engelacala amanga ngitsho lokhu yisenzo somuntu. Sengibhodile ebantwini bangitshela ukuthi ngumuntu ogangayo ongafuni umntanami afunde.
“Manje lapho dadewethu vele angibuyeli emuva, uzabona umnikazi uzabona indlovu qithi emzini wakhe aswele lokuthi ayengaphi, ngilapha angihlalanga phansi ngizama ukulungisa umhlola lo,” kuphetha uMnu Shoko.
