uMthunywa
Bongani Ndlovu
KULENDODA yeBeitbridge etshiye umthethwandaba weBeitbridge ubulawa zinsini nanko phela icele umantshi ukuthi ayizwele lapho eyigweba ecaleni layo lokweba ngoba ithi idinga ukuyakwelatshwa ngoba ilomkhuhlane wokukhanuka ukuya emacansini labesifazane.
UGona Zimbaba oleminyaka yokuzalwa engu-18 ubemiswe phambi komthethwandaba esetheswa icala lokutshontsha incingo zenkampani yeTelOne yeBeitbridge ngesikhathi ekhuluma la amazwi.
Kazange athande ukumotsha isikhathi senkundla uhle walivuma icala lakhe.
Umtshutshisi walelicala uMnumzana Oswell Arufandi ubikele inkundla ukuthi mhlaka 4 Nhlolanja ngehola letshumi ekuseni umamangala watshontsha intambo ze-copper zenkampani yeTelOne eduze leDoves Funeral Parlour.
Ngemva kwalokhu bakhona abambonayo abancweba amapholisa indlebe amapholisa ahle aphuthuma amfica elokhu etshontsha incingo lezo eziquma ngengqamu.
Incingo azitshontshayo kubikwa zilesisindo esingange 1,5kg.
Umantshi kulelicala uMmnumzana uNdlovu uthe esegweba umsolwa wacelwa ukuthi afake imicijo engabangela ukuthi inkundla imehlisele isigwebo umsolwa wathi uyagula.
Uthe ucela inkundla imxolele angayi ejele ngoba udinga umuntu ongamelapha nanko phela uphethwe yisifo senkanuko.
Uthe ulohlupho olumkhulelayo lokuthanda ucansi kungakho kungamhlupha nxa angayahlala ejele.
Umantshi uthethe isinqumo sokuthi ayehlala ejele okwenyanga ezingamatshumi amabili.
