uMthunywa
Thokozile Mbedzi
KULOMFANA weThekwane eBulilima ozibophele ngemva kokungezwani lomasihlalisane kanina okuyisehlakalo esitshiye abantu bedanile kakhulu.
Kubikwa uFortune okungasatholakalanga isibongo sakhe ubesenza izifundo zakhe eyunivesithi njalo ubeseku-attachment kodwa ubengathokozi ngendlela unina ongumfelokazi akade esehambisana lenye indoda. Kubikwa unina ubesehlala lalindoda okwenze lumfana wacunuka kakhulu okokuthi ucine ezibophela.
Ekhuluma lentatheli kaMthunywa omunye wabomakhelwane abaseduze uMnumzana Velempini Mpofu uveze ukuthi usele etshe amathe ngesehlakalo lesi ngoba umfana lo uzibulele ngoba engavumelani lokuzwana kukanina lenye indoda ebisingumasihlalisane wakhe.
“Angilankani ngilapha, sonke nje isigaba siphelelwe ngendlela umfana lo athethe impilo yakhe ezonda umasihlalisane kanina nje kuphela wakhetha ukuthi azibophele. Simngcwabe ngoMgqibelo odluleyo.
“Kukhanya kazange amukele umasihlalisane kanina okuyikho okubangele ukuthi enze ihlazo elingaka.
“Okubuhlungu kubo bonke omakhelwane yikuthi umfana lo ubesesenza izifundo zakhe zemfundo yaphezulu lapho abesesenza i-attachment yakhe.
“Lokhu kuzwisa wonke umuntu ubuhlungu ngoba nxa umntwana efundile uyabe efundele isigaba sonke njalo ubalusizo emphakathini.
Watshiya ebhale incwadi yokuvalelisa abafowabo kodwa bona bebekuthatha ukuthi ngumuntu otsho ukuthi sebuyele lapho aqhuba khona izifundo zakhe zomsebenzi kanti ubavalelisa ukuba kaseyi kuphinda njalo ababone,” kulandisa uMnu Mpofu.
Esinye isakhamuzi sakulindawo uNkosazana Martha Mthethwa uchaze ukuthi bona bezwa ubuhlungu kakhulu nxa intsha isingenwa ngumoya obuhlungu kangaka wokuzibulala bona kuyibo abantu abakhanyiselweyo ababona amabala.
“Sibuhlungu ngentsha esingenwa ngumoya wokuzibulala bona beyibo abakhanyiselweyo bangena kwezemfundo. Kuyisimanga lokhu kumbe uhlungiwe nje ngoba indlela okwenzakale ngayo akuzwisiseki lakancane, lokhe sibuzana ngakho kodwa singatholi impendulo.
“Okunye okusizwisa ubuhlungu yikuthi unina uzaphila njani umntwana efe ngenxa yokuthi uthandana lomasihlalisane wakhe,” kulandisa uNkszn Mthethwa.
Isikhulumi seMatabeleland South uInspector Philisani Nyathi ebuzwa ngodaba lolu uthe kenelisanga kuthola ulwazi ngalindaba kunkamba eseduzane lalapho umfana akade ehlala khona ngoba ucingo lwabo lungasebenzi kubangelwa yikuthi indawo yakhona ibingelamagetsi kuliviki.
