uMthunywa
Fungai Muderere
UMDLALI wenguqu uWinston Mhango kubikwa usezama inhlanhla yokungena kuqembu le-Adachi elikuZifa Division One kumhlubulo ongezansi yelizwe.
UMthunywa uzwe ngokugcweleyo ukuthi umdlali lo, owake waligiqa kuHighlanders, Hwange, FC Platinum leZPC Kariba, usefuna ukuvuselela umdlalo wakhe ngenyathelo elitsha.
UMhango nguye lo owake wabotshelwa ukutholakala elomxhaka wembanje lezinye izidakamizwa esadlalela iZPC Kariba.
Isehlakalo lesi sambuyisela emuva lumdlali nanko phela waxotshwa yiZPC Kariba.
Ekhuluma lentatheli yeZimpapers Sports Hub, uMhango uthe usefuna ukuqala kakutsha.
“Njengoba sekusele imidlalo emine andubana kuphele isizini yalonyaka, ngibone kufanele ukuthi ngizame ukuthola ukuqina ngokulolonga leqembu le-Adachi.
“Njengomdlali kumele ngikhangele kuhle umzimba wami. Ngemva kwalelithuba, ngizacabanga ngenyathelo engizalenza ngekusasa lami,” kutsho uMhango.
Iqembu le-Adachi liqeqetshwa nguPhilani “Beefy” Ncube owake waqeqetsha njalo iqembu leBulawayo City leHow Mine.
Iqembu le-Adachi liphethwe ngezinye ingcitshi zomdlalo ezibalisa unozinti wabonompembe uPeter “Oxo” Nkomo loJohannes “Tshisa” Ngodzo.
UMhango, okungathandabuzwayo ukuthi ulethalenta kunobhutshuzwayo, ubike ukuba uhlose ukuphenduka emdlalweni elomdladla njalo usefunde okunengi ngamaphutha awenzayo phambilini empilweni yakhe.
Umdlali lo uyenelisa ukulibamba esiswini senkundla, qede lapho aligiqe njalo emhlubulweni wesandleni senxele kubagadli. Bake bamuzwa kunkundla zeligi yeZambia esadlala kuqembu leKabwe Warriors.
