Uwindi ugwaza umtshayeli kumbango wabagadayo

Thokozile Mbedzi 

ZILOKHE zinkemile izihambi zeNkulumane Complex koBulawayo kulandela ukuba omunye uwindi egwaze umtshayeli wenye imota esola ukuthi kungani ethwala abantu abalapho.

Isehlakalo leso senzakale ngeSonto edluleyo endaweni yamabhasi le.

Kubikwa uSaul Ncube oleminyaka engu-34 yokuzalwa onguwindi eComplex yeNkulumane ugwaze omunye umtshayeli ofike wathwala abantu phandle kwe-terminus ngemota engekho emthethweni.

Omunye umfakazi othengisa endaweni le obone lokhu, uMnumzana John Banda uthe isenzo sikawindi lo sethuse abanengi.

“Indaba kawindi ogwaze umtshayeli wenye imota ilokhu iyindaba esegudwini lapha esithengisela khona eNkulumane Complex.

“Uwindi lo wazonda ukuthi kungani umtshayeli lo efike wagadisa abantu baqala ukuxabana sekubangwa abantu kunye lokuthi izihambi lezi kungenzakala zehlelwe ngokubi kungaziwa ukuthi yiphi imota ezithweleyo.

“Belokhu besaphikisana uNcube wacina ekhipha ingqamu wagwaza umtshayeli lowo esiswini,” kulandisa uMnu Banda.

Indaba le yahle yabikelwa amapholisa ngokuphangisa, umtshayeli wathwalelwa esibhedlela seMpilo.

Isikhulumi samapholisa koBulawayo uInspector Abednico Ncube ebuzwa ngodaba lolu uvumile wathi solufikile kibo.

“Udaba lwamadoda amabili agwazane kubangwa ukuthwala eNkulumane Complex sisaluchwayisisa.

“Amapholisa axwayisa uzulu ukuba ehlukane lomkhuba wokuthwala izikhali eziyingozi njalo nxa sokube lengxabano kabadinge abanye abangabeluleka ukuxazulula inkinga abayabe belazo,” kuphetha uInsp Ncube.