uMthunywa
Nkosilathi Sibanda
INHLANGANISO yePremier Soccer League ilakho ukuthi ibeke isijeziso esikhulu kumaneja weDynamos uRichard Chihoro kulandela ukubonakala kwakhe efafaza lokuvuvuzela phakathi kwenkundla, kumdlalo weqembu lakhe leHwange ngempelaviki edluleyo.
Umdlalo lo, ubusenkundleni yeBarbourfields ngoMgqibelo.
UChihoro usedumile enkundleni zokuxhumana kulandela ukusabalala kwevidiyo lapho akade ebhoda egedini okwakugadle iHwange.
Kuvidiyo le, umaneja lo ufike wakhupha isigujana samanzi waqala “ukuchela” okukhanya kungamanzi phambili kwegedi leHwange. Isizatho salokhu asaziwa kodwa inengi licabangela ukuba kwakungumuthi.
UChihora usuke lapho wavula isikhwama sebhulugwe wasithintitha, kwaphuma okuthile kuthintithekela phansi khonapho.
Phezulu kwalokho, abasekeli beDynamos bahluthuna ithawulo elimhlophe likanozinti weHwange, uNedrick Madeya, balitshisa.
Kunguqu konke lokhu akuvunyelwa njalo kulihlazo ngoba kubaliselwa ngokuthi ludlame.
Ngokunjalo, inhlanganiso yePSL isibike ukuba iphezulu kokucubungula udaba, nanko isalinde imbiko evela kunompembe.
Kulokhu uChihoro ukhangelelwe ukuthi aqondiswe ngezijeziso nxa iPSL ingamthola elecala.
Isikhulumi sePSL, uKudzai Bare sibikele intatheli yephephandaba likazulu ukuba okwakhathesi inhlanganiso yabo angeke itsho okunengi ngesehlakalo salumdlalo, andubana ithole imbiko evela kubonompembe labaphathi bomdlalo.
“Akukho esingakuphawula ngaloludaba ngoba asikatholi imbiko yomdlalo,” kutsho uBare ngoLwesithathu emini.
Ukukholwa okukhona kunengi labalandeli bomdlalo yikuthi uChihoro wayethela umuthi enkundleni. Kubikwa ukuhluthunwa lokutshiswa kwethawulo likaMadeya kwabangelwa yikuthi iDynamos yakholwa ukuba ithawulo le ngeyomuthi.
Okwacunula abasekeli beDynamos yikuthi abagadli babo babelokhe bekhutha ukuhlohla.
“Lathi sasicabanga ukuthi umfana weHwange (uMadeya) uthwele umuthi ngethawulo yakhe,” kutsho omunye umlandeli weHwange owayesemdlalweni lo, ozibize ngokuthi uKhodza.
Ngaleso isikhathi amaqembu womabili ayesabambene, kungutshiki lobhanqa 0-0.
Yacina ihlohla iDynamos, yanqoba nge 1-0. Kwahlohla uTinashe Makanda, owake wadlalela iHighlanders.
Ukwenza kukaChihoro kufana xathu lokwenziwa ngu-Auwal Mohammed oweqembu leShooting Stars yeNigeria owachamela ephakathi kwenkundla yeLekan Salami edolobheni le- Ibadan.
Inkokheli le yajeziswa ukuthi ingalugxobi enkundleni zenguqu okomnyaka owodwa.
