uMthunywa
YiNtatheli kaMthunywa
KULOMBALISI weLupane esikolo seSipopoma Primary obhaxabulwe ngezigodo phambi kwabantwana besikolo ngesinye isakhamuzi ngemva kokusithathela indoda.
UNkosazana Mercy Madzivire ongumbalisi ulokhe ethoba amanxeba ngemva kokuvutshwa ngunkosikazi kaNdodana Ndimande ngoba esemthathele indoda.
Umfakazi ongathandanga ukuvezwa ngegama ubikele iphephandaba likaMthunywa ukuthi lumbalisi vele ubesehluphile ngokukhomba amadoda abanikazi esigabeni.
“Lumbalisi udumile esigabeni njalo uhlala esiyakhuzwa koSobhuku ngezenzo zakhe, kayiwa emadodeni abanikazi, uzibona engumbalisi sebona angathi amadoda wonke ngawakhe. Izakhamizi zonke zikhala ngaye kodwa khathesi uze wawuthola umvuzo omfaneleyo.
“Indoda le abeyikhombile incane kulaye njalo kukhanya umama lo ubeselesikhathi esizwa ukuthi umkakhe uthandana lombalisi lo wacina ebona ukuthi usedlule yikho nje emlande esikolo wayamtshaya phambi kwabafundi.
“Wayembhula ngezigodo angathi ngumuntu obhula amabele njalo kakho ngitsho loyedwa owalamulayo ngoba vele ubesehluphile. Kwaze kwanceda umphathisikolo uMnumzana uChauke.
Intatheli kaMthunywa ikhulumisane loNkosazana uMercy Madzivire yena ophike wemba phansi ukuthi utshaywe yisakhamuzi ngoba esithathele indoda.
“Indaba elikhuluma ngayo angiyazi njalo angizange ngizwe ngayo. Vele indaba le uyitshelwe ngubani ngifuna yena lowo olitshelileyo,” kuthetha uNkszn Madzivire.
UMthunywa ubuye waxhuma loSobhuku wesigabeni lesi uMnumzana Clement Mhlanga yena ovumileyo ukuthi kulombalisi owabhaxabulwa phambi kwabafundi.
“Indaba le ngiyayazi, sike sahlala phansi sakhuza uNdimande njalo wavuma ukuthi uzehlukana lombalisi lo kodwa umkakhe nguye owayesidla amalangabi ethi okumcunulayo yikuthi umbalisi lo uyafonela umkakhe ebusuku belele.
“Kuthe ngemva kokuba ayemtshaya esikolo sahamba khonale esikolo ukuyabakhuza kodwa uNdimande wayesebalekile ngakho umkaNdodana wasesongelana lombalisi lo,” kulandisa usobhuku uMhlanga.
Imizamo yokuxhumana lomphathi wesikolo seSipopoma uMnu Chauke yehlule ngoba engadobhi ucingo lwakhe.
