uMthunywa
Bongani Ndlovu
IDANCEHALL ngumculo osusabalale umhlaba wonke usuka kweleJamaica. Abaculi ababuya emcabangweni nxa uthinta lindaba bagoqela oVybz, Buju Banton, Sean Paul, Rihanna, Mavado, Sizzla labanye.
Kwelakithi silabafana loWinky D, Soul JahLuv, Jah Signal, Enzo, Killer T labanye abaphakamisa ifulegi leDancehall.
Umculi uMunashe ‘‘Mnaraman’’ Musokonyi wakoBulawayo elokitshini laseCowdray Park ukhiphe ingoma yakhe u-Why esithole uthando kanye lonanzelelo oluvela kubalandeli ngemva kokukhipha ividiyo kuYouTube ekwenye ilodge yakoBulawayo. Kule ividiyo uphelekezelwa ngujaha uSdakwa Shine laye obeka amachacho akhe ngendlela ehlabusayo.
Ekhuluma lephephandaba likazulu uMthunywa uMnaraman ubonga abalandeli bakhe abaqhubeka ngokulandela umsebenzi wakhe iloba kusasenzima. “Ngithanda ukubonga abalandeli bami abaqhubeka bengilandela njalo bengincedisa ukuthi ngibe ngumculi ongcono ngoba lindlela inde njalo uyabadinga abantu bokuhambisana labo.”
Kulingoma umculi ukhala ngesithandwa sakhe esingasuthisekiyo ngemizamo yakhe yokusakhela impilo ibengcono.
“Injongo yale ingoma levidiyo yikuthi sibonise isizwe ukuthi indlela yothando inzima kithi sonke ayikhethi ukuthi ulemali kumbe ungumyanga kodwa ekucineni nxa kuluthando lweqiniso luyaqhubeka luhlabusa ngaphandle kobunzima,” kuveza uMnaraman.
Uqhubeke waveza Kulobunzima nxa ungumculi weDancehall ophuma koBulawayo ngoba intshantshu zayo zivela eHarare.
“Sengilemnyaka eyisithupha ngihlabela iDancehall kodwa kunzima ukwenza ibizo lami lazakale ngoba ingcitshi ziseHarare njalo labosomabhizimsi bemaClub akoBulawayo bafuna abahlabeli beHarare,” kuphetha uMnaraman.
