uMthunywa
Musa Janga
KULENDODA yeBeitbridge eDulibadzimu emiswe phambi komthethwandaba weBeitbridge isetheswa icala lokutshaya umkayo kanye lokubhidliza impahla endlini ngoba incitshwe ucansi.
Kubikwa uCharles Bwerinofa oleminyaka yokuzalwa engu-39 wetheswa icala lokubhaxabula umkakhe uAntonette Zhiradzago ngemva kokuba eyale ukuhlangana laye emacansini okusuke kwamcaphula wavuka ubhova.
Umtshutshisi uNkosazana Tsitsi Mutikwa ubikele inkundla ukuthi mhlaka 22 Mbimbitho ngehola lika-9 ebusuku umsolwa wafika endlini edakiwe nanko phela kukhanya wayetshone ekhelela umagwebu.
Kubikwa wathi efika endlini umkakhe wayeselele wasemvusa edinga ayekufuna kodwa umkakhe kubikwa wala. Kubikwa lokhu kwamcaphula umsolwa wahle wavuka ubhova waqala ukubulala impahla endlini, etshayelela imiganu phansi kanye lokunye. Kubikwa wathi eqeda lapho weqela umkakhe ngezibhakela emzimbeni wonke okwabangela ukuthi alimale.
Umsolwa wathi ephunyuka walubhekisa emapholiseni lapho afika wawabikela ngokwakwenzakele andubana umsolwa abotshwe. Ethoniswa ngalelicala umsolwa kazange athande ukudlalisela inkundla isikhathi, uhle walivuma icala lakhe, wathi okudale ukuthi enze njalo yindlala yocansi.
Ngemva kokuba umtshutshisi uNkosazana Ndlovu alelisise lelicala unqume ukuthi asebenzele umphakathi okwamahola angu-105.
