Uvikela uPitisi uKaindu

16 May, 2024 - 00:05 0 Views
Uvikela uPitisi uKaindu uRaphael Pitisi

uMthunywa

Nkosilathi Sibanda

UMQEQETSHI weqembu leHighlanders, uKelvin Kaindu uthe kaboni phutha kunozinti wakhe uRaphael Pitisi.

UKaindu ukutsho lokhu kulandela ukukhonona kwenengi labalandeli beqembu abathi unozinti lo “uyavuzisa” nanko phela uhlohlwa lula.

UPitisi bamhlohle ezimbili ngabadlali beFC Platinum oweligi yeCastle Lager, eBarbourfields ngeSonto.

Unozinti lo ungenele indawo ka-Ariel Sibanda, osebambele iHighlanders okweminyaka eyedlula itshumi. UPitisi nguye osekhethwe ngabaqeqetshi ukuthi avimbe igedi ngesikhathi uSibanda esahlolwa ukuqina kwakhe ngodokotela.

Loba bemvuthele ngamabhola amabili ngeSonto, uKaindu uqine ngokuthi uPitisi ngunozinti kuzwa.

“Silabadlali abangamatshumi amabili lasitshiya galolunye. Ngokubona kwami, wonke umdlali owasayina leqembu, kumele aphiwe ithuba lokuthi adlale loba kuwuphi umdlalo.

Kelvin-Kaindu

“Ngumdlali osakhula. Sidlalise njalo lomunye osakhulayo, ku-left back, kutsho umqeqetshi lo owaziwa kakhulu ngokukholwa kuthalenta labadlali abasakhulayo lalabo abanganikezwa ithuba lokuzitshengisela kumidlalo emikhulu.

Ukuswelakala kukaMelikhaya Ncube, owandise ukutshibilika esiswini senkundla, kumdanise kakhulu uKaindu.

“Ngicabanga ukuthi ukungabi khona kukaMelikhaya kusiphambanise kakhulu ngoba ubengumdlali ebesimsebenzisa kumidlalo yonke.

“Sehluleke ukuhlohla amabhola lokuthi sisebenzise amathuba ebesiwathola phambili.”

Uyibeke yacaca indaba yokuthi udinga abagadli abatsha.

“Kasiqinanga phambili ngoba nxa sifuna ukuthi sikhiphe umgadli, kubanzima ukuthi sifake umgadli njalo. Yikho sikhuthaza ukuthi kuhlohle wonke umuntu.

“Ngikhuluma ngokuthi kumele silinganise indawo, ikakhulu kubadlali abaphambili,” nguKaindu lo.

Isikhalazo sikaKaindu kasiqali ukufinyelela endlebeni zabalandeli labaphathi beqembu. Lokhe waqeqetsha iHighlanders, uKaindu ufika “kwakhiwe” abaphathi beqembu sebethenge abadlali babo.

Share This:

Sponsored Links

Survey


We value your opinion! Take a moment to complete our survey

This will close in 20 seconds