uMthunywa
Bongani Ndlovu
LIQHUBEKELA phambili kwezokuzithokozisa isotsha eliphuma eMakokoba edolobheni lakoBulawayo nanko phela seliphinde lazakhela udumo ngokukhipha ingoma ngokuphuma kukhasi leDream Chaser Magazine International.
UNjanji Nsimbi Wombe uthole lelithuba ngemva kokuba ekhiphe enye yezingoma zakhe ezithi Kuvhundutsa Vanhu, esithethe izithandwa zomculo kanye labatsha ngodumo ngoba ehlabela esebenzisa isiShona lesiNdebele.
Ikhasi lobulembu leDream Chaser Magazine International lasungulwa ngo2015 eUganda lihamba likhangelela abantu bodumo abenza kuhle ezigabeni zakubo ngemizamo yokuthuthukisa ikusasa lentsha kwezokuzithokozisa. Ikhasi leli selibhode i-Africa lidinga inkanyezi ezenza kuhle kulelo zinga nanko phela selakhipha uMumba Yachi ongumhlabeleli weZambia, uSinach ohlabela iGospel eNigeria, uTaiwo Ajai-Lycett ongumdlali kamabonakude eNigeria kanye loEddy Kenzo.
Ekhuluma lekhasi likazulu uMnu Njanji olebizo lokuzalwa uNoah Wambe uveze okukhulu ukuthokoza ngokuphuma kukhasi leli.
“Ngaphansi kokuzehlisa kwami okukhulu ngembese intokozo enkulu kakhulu ngoba lokho kuyabonisa ukuba amandla ami awapheleli emoyeni njalo lebizo engizama ukulakha liyaphumelela.”
“Ngiswela amazwi okutshengisela ukubonga kwami kukhasi lobulembu leli elingifake ebantwini okutsho ukuthi ngizabonakala kumajiko onke ezwekazi leAfrica laphetsheya. AbeDream Chaser bahamba bekhetha abantu abalodumo njalo abenza kuhle ezindaweni abahlala kizo,” kuveza uNjanji.
Uqhubekele phambili waveza ukuthi bazakube besethula idlalade elitsha likaMicky Roller Grand Hotel eShurugwi kuyonale iviki,” kuphetha uNjanji.
