uMthunywa
Wayne Ncube
KULOMQONDISI wenkampani yePrimed and Ready Enterprise koBulawayo omiswe phambi komthethwandaba esetheswa amacala amathathu okuqila abantu imali engange R425 000 leUS$12 000 yezindlu zabo.
Umsolwa uMarvelous Dube (26) ongumqondisi wenkampani le yokwakha, kazange abuzwe ukuba uyalivuma kumbe uyalilandula icala lakhe ngesikhathi emiswe phambi kukamantshi uMnumzana Lizwe Jamela emthethwandaba weTredgold
Umantshi uzwe ukuba uDube kanye lomsekeli wakhe olokhu engakabotshwa babopha iqhinga lokuqila abantu imali zezindlu kanye lezitendi ababebathengisela zona .
Kubikwa ngoZibandlela ngomnyaka ka2019 uGreefield Nyoni welokitshini leMagwegwe North wafika enkampanini yePrimed efuna ukuthenga indlu.
UDube wenza angathi kulendlu ethengiswayo wathi kabhadale i$16 000 kodwa wasebhadala i$12 400 kwasekusehlula ukuba anikwe amaphepha endlu bathi alokhu esalungiswa ngoba umnikazi waleyondlu ehlala eGoli.
Kucala lesibili kubikwa ngomnyaka ofanayo ngenyanga kaNhlolanja uPriscilla Maphosa ohlala elokitshini le-Old Magwegwe waqilwa ngokufanayo imali yesitanda athi bamthengisele sona. Kwelesithathu icala watshayela esikhewini imali kaMaphosa engangeR200 000.
Ngemva kokuzwa lokhu umantshi udlulisele phambili ukuthoniswa kwecala leli kumhlaka 20 Mbimbitho.
