uMthunywa
Thokozile Mbedzi
KULENDODA yeKwekwe eleminyaka engu-35 ebotshwe kulandela ukutshontsha imota yomqhatshi wayo.
Kubikwa uAlick Dube owaziwa ngelithi Samaita oleminyaka engu-35 weMakaure, eKwekwe untshontshele umqhatshi wakhe imota obemqhatshe njengo-taxi driver wemota yohlobo lwe-Honda Fit.
Kuvele ukuthi uDube lomqhatshi wakhe babelesivumelwano sokuthi nsukuzonke uyaletha imota ngehola lika 7 ntambama kodwa ngalelolanga wathi imota itshontshiwe ngesikhathi emile kwenye i-car park eqamba amanga.
UMthunywa uzwe ukuthi uDube wakhipha ama-number plates emota leyo, umshuwalensi le-licence disc watshaya imota waqonda koBulawayo eKelvin lapho afika wathengisela enye indoda imota le.
Kubikwa lowo owayethengiselwayo wabiza amapholisa ukuze baqale bamncedise ukuthola ukuthi imota leyo kayitshontshwanga engakayibhadaleli.
Kubikwa amapholisa ekukhulumisaneni laye kwacina kuvela ukuthi imota leyo wayeyitshontshile.
Isikhulumi samapholisa koBulawayo uInspector Abednico Ncube uqinisekise ukuthi kulendoda ebotshelwe ukutshontsha imota.
“Kulendoda yeKwekwe uAlick Dube otshontshele umqhatshi wakhe imota yohlobo lweHonda Fit emhlophe.
“Ababili laba babevumelane ukuthi imota nsukuzonke ngehola lesikhombisa ntambama kumele iyokuma komqhatshi wakhe kodwa mhlalokho wathi imota itshontshiwe.
“Udaba lolu lwahle lwabikelwa amapholisa. Ngelanga elilandelayo ngehola lesihlanu ilanga selisiyatshona uAlick ubesekoBulawayo eKelvin North ethengisa imota leyo ukuze ibulawe kodwa lowo owayethengiselwa wabiza amapholisa ukuze azoqinisekisa ukuthi imota leyo ngeyakhe andubana ayibhadalele.
“UAlick wehluleka ukukhipha ngitsho lebhuku lemota ekubuzisisweni kwacina kuvela ukuthi uyitshontshile wahle wabotshwa. Amapholisa athanda ukubonga obulala izimota ngokuthembeka, ukunanzelela lokusebenzelana lamapholisa ukuze izephulamthetho zifinyelelwe yingalo yomthetho.
“UAlick uncedisa amapholisa ukuphenyisisa ngodaba lolu njalo uzakuya emthethwandaba masinyane,” kuphetha uInsp Ncube.
