Thokozile Mbedzi
KULENDODA yeMatshinje ePlumtree egongodwe yafa kulandela ukutshontsha umakhalekhukhwini esitolo ithenga, uMthunywa ukuzwile lokhu.
Umuyi uMlindeli Sebele oleminyaka yokuzalwa engu-30 ubhubhe ngoLwesine ngeviki ephelileyo.
Kuzwakale ukuthi uSebele wangena esitolo ethenga kodwa kwakungela tshintshi kungakho lo owayethengisa wathi esiyayidinga, yena wasala etshontsha umakhalekhukhwini.
Kubikwa untombazana othengisayo wathi ephenduka wafika wanika uSebele itshintshi yakhe wasephuma.
UMthunywa uzwe ukuthi untombazana othengisayo esenanzelele ukuthi umakhalekhukhwini wakhe usetshontshiwe wabikela amajaha ayeseduzane bona abahle bahlala uSebele izithende bamfica elaye lowo umakhalekhukhwini.
Esinye isakhamuzi esibikele uMthunywa ngodaba lolu, uMnumzana Limukani Dube uthe abafana laba sebethole uSebele elomakhalekhukhwini otshontshiweyo bahle bamtshaya okwabangela ukuthi ngelanga elilandelayo avuke efile ezitolo.
“UMlindeli kukhanya abafana bathi bebona ukuthi ngempela nguye isela bamtshaya kakhulu bangakhethi ukuthi bamtshaya ngaphi amanxeba amkhulela wasebhubha.
Isikhulumi samapholisa esabelweni seMatabeleland South ulnspector Philisani Ndebele ebuzwa ngodaba lolu uthe solufikile ewofisini yakhe.
“Udaba lwendoda efike esitolo yatshontsha umakhalekhukwini bayigongoda yafa solufikile ewofisini yethu ngakho sithi uzulu kangafaki umthetho ezandleni zakhe ngoba lapha sesilahlekelwe yimpilo kukanti umthetho ubungamjezisa ngendlela kungela kulahlekelwa yimpilo,” kuphetha ulnsp Ndebele.