uMthunywa
Ethel Ncube
KAZIYIVALI imlomo izakhamizi zesigabeni seGwampa eLupane ngesinye isakhamuzi okucatshangelwa ukuba satshontsha ubabhemi wesinye isakhamuzi wsmfihla endlini.
Kunakanelwa ukuba kuviki ephelileyo, uMnumzana Sijabule Sibanda engabe watshontsha ubabhemi kaMnumzana Gilbert Ndiweni qede wamfihla endlini.
UMthunywa uxhumane lesinye isakhamuzi uMnumzana Dingani Siziba oveze ukuba bacabangela ukuthi ubabhemi owatshontshwayo uhlaliswa endlini.
“Okwenza sicabangele ukuthi ubabhemi umgcina endlini yikuthi nxa edingwa esibayeni asimtholi kodwa amasondo akhe aphelela egumeni lakhe phambi kwendlu yakhe ehlala ivaliwe.
Leyondlu kasikaze siyibone ivuliwe.
“Ubabhemi lo wacatsha esidla egangeni lenkomo zakhe kazange aphinde abonakale abanye bathi bayake bambone emqhuba esiyamnathisa ebusuku, kwezinye insuku uyambophe alime ngaye. Lapho esihlala khona kukhatshana lamapholisa sifuna ukuqala siyidinge siyibone lindaba angala laye ke sesibona ukuthi simthini sifuna ukumbamba xhaka,” kutsho uMnu Siziba.
UMthunywa uxhumane lomnikazi kababhemi uMnumzana Gilbert Ndiweni oveze ukuba sebethole udletshana lokuba ugcinwa endlini yesinye isakhamuzi.
“Okwenza sithi ubabhemi bamfihla endlini yikuthi abantwana bathi bedlala omunye wabo wakhuluma ukuthi ubabhemi ongayisuye wabo bamvalela endlini.
“Ubabhemi lo uyasebenza njalo nguye ebesimthembile emfolweni nanko umuntu semtshontshile,” kutsho uMnu Ndiweni.
Ekhuluma loMthunywa lowo ocatshangelwa ukuba untshontshe ubabhemi uMnumzana Sijabule Sibanda uthe kazi lutho ngobabhemi lo okuthiwa kabonakali.
“Bakutshele okungayisikho bathi indaba ingaphuma ephepheni yikho lapho okuzaphuma khona ubabhemi na?
“Mina ngambona angimthathanga. Indlu abathi itshona ivaliwe ngeyami kwalahleka amakhiye yikho behlala beyibona ivaliwe abahambe emapholiseni bayekhuluma bahlaleleni bengabiki indaba yabo,” kutsho uMnu Sibanda.
Intatheli ikhulume lesikhulumi samapholisa eMatabeleland North uInspector Glory Banda, wathi indaba kababhemi owatshontshwayo okwakhathesi ibingakafiki ewofisini yabo.
“Indaba le kayikafiki kithi ngapha kodwa sizaqhubeka sidingisisa ngayo.
“Uhlupho yikuthi besisehluleka ukuxhumana lamapholisa akulindawo elikhuluma ngayo,” kuphetha uInspector Banda.
