uMthunywa
Ethel Ncube
KULENDODA yeBinga ngaphansi kwenduna uDobola ekhiyelwe endlini yalumathiswa andubana ithi izama ukubaleka yagongodwa ngenduku okwenyoka ebonakale ekhaya yedlula emhlabeni yindodana yayo, isetheswa icala lobuthakathi.
Indaba le yenzakale emavikini asanda kwedlula lapho umetheswacala uBrighton Ncube oleminyaka engu-37 yokuzalwa abulele uyise uScava Ncube oleminyaka engu-63 yokuzalwa, ngokuqala amkhiyele endlini ayilumathise andubana amqedise ngokumgongoda ngenduku ethi uyamloya.
uInspector Glory Banda, Matabeleland North
UMthunywa uzwe ukuthi uBrighton waqala wakhiyela uyise endlini waseyilumathisa ngenhloso yokuba atshele phakathi kodwa uyise wenelisa ukuphuma kanti ngalelolanga wayevele efuna ukumqeda wamgijimisa wamgongoda ngenduku wawawela phansi andubana adobhe ifotsholo wamhlahlela ngayo wamtshiya esesimeni esibi wafulathela.
Kubikwa unina kaBrighton wathi ebona ukuthi umntanakhe ungani usefikelwe lidlozi lokubulala wacela ezinyaweni wayacatsha egangeni.
Kubikwa uNcube wathwalelwa ekilinika yeLusulu lapho adlulela khona.
Isikhulumi samapholisa eMatabeleland North uInspector Glory Banda uqinisekise ngodaba lolu.
“Indaba le yafika endlebeni zethu. Sikhuthaza uzulu ukuba atshiye ubudlwangudlwangu ukuze kungalahleki imphefumulo,” kuphetha uInsp Banda.
