uMthunywa
Wayne Ncube
KULOMFUNDI weBulawayo Polytechnic omiswe phambi komthethwandaba weTredgold esetheswa icala lokutshisa uyisemkhulu ngephethulo okubangele ukuthi afe.
Umsolwa obizwa ngelokuthi Kudzai Munemo oleminyaka engu-22 yokuzalwa ubikele umthethwandaba ukuthi yena labafowabo babehlala begula sikhathi sonke okwabenza bacabanga ukuthi uyisemkhulu uTedious Munemo nguye obaloyayo. Uthe indaba yokuthi kwakucatshangelwa ukuthi uyisemkhulu ngumkhunkuli yayisaziwa ngabantu bonke emulini.
Umtshutshisi kulelicala uMnumana Bheki Maphosa ubikele umthethwandaba ukuba umsolwa watshisa uyisemkhulu ngephethulo wayalaliswa esibhedlela okwamalanga amahlanu andubana abhubhe. Uthe umsolwa wathela ukhulu wakhe ngephethulo andubana amlumathise ngomentshisi okwabangela ukuthi atshe emzimbeni ikakhulu ekhanda.
Umthethwandaba ubikelwe ukuba imuli kaKudzai Munemo yathi ngokunanzelela ukuthi ihlala ihlaselwe yimikhuhlane yavakatshela usiyazi okubikwa wabatshela ukuthi umuyi ulemikhoba enza bagule njalo baphambane ingqondo.
Kuvele ukuba kwabizwa umphurofethi ukuthi azohlanza umuzi walimuli njalo kubikwa ngesikhathi esenza imithanithani yakhe wakhipha izinanakazana ezifana lembankwa endlini wabaxwayisa ukuthi bazitshise kodwa umuyi waqina ngokuthi kaziphoselwe esambuzi.
Umsolwa ubike ukuba yena wacetshiswa ukuthi kwakuleminye imikhoba eyayisele ekamelweni likayisemkhulu ngakho kumele itshiswe ukuze benelise ukuphila kuhle, kwavunyelwana njengemuli ukuba umsolwa ahambe endlini kamuyi ayodinga imikhoba le.
Umthethwandaba uphinde wezwa njalo ukuthi ngalelo langa umsolwa waphiwa isiwatsho sokugeza ubuso ukuze enelise ukubona isikhwama esilemikhoba, i-eucalyptus oil agcoba ngayo izandla ukuze angakhulelwa yimikhoba le kanye lephethulo lomentshisi ukuze atshise kuhle isikhwama leso.
Amagqwetha kamsolwa avela kufemu yeTanaka Law Chambers abikele inkantolo ukuba umsolwa wethuka ngesikhathi ethola umuyi esendlini, kungakho ukuze amtshise yena wayezibona esilwa lamadimoni, izilwane kanye lemibankwa emikhulu.
Baqhubekele phambili babika ukuba umsolwa wayengacabanganga ukwenza icala leli njalo wayezwana kakhulu lomuyi.
Umthethwandaba uphethe ngokuthi umsolwa ayehlolwa ingqondo ngaphambi kokuba aphiwe isigwebo sakhe.
