uMthunywa
Ethel Ncube
KULENDODA yesiqintini seSiachilaba eBinga okubikwa ife ngelanga eyaphurofithwa ukuthi izakufa ngalo ngumphurofethi odumileyo, uEmmanuel Mutumwa.
Insindabaphenduli le, isemlonyeni yezakhamizi njalo lenduna yakulindawo uSiachilaba iyakufakaza lokhu. Ekuqaleni kwenyanga kaMfumfu uMphurofethi uMutumwa wavakatshela eSiachilaba wayakwenza inkonzo. Kubikwa uthe esephurofitha abantu wadobha uFanuel okungasatholakalanga isibongo sakhe wamtshela ukuthi uzakufa mhlaka 15 ngenyanga efanayo ngoba kulomoya omlandelayo.
UMthunywa uzwe ngabafakazi abaqotho ukuthi mhlaka 15 Mfumfu uFanuel watshona ekhelela utshwala emavinkilini eSiachilaba wathi esegada ibhasi ilanga selikhotheme ukuze abuyele ngakibo wawa ezama ukugada ibhasi yamgxoba wafa.
Abafakazi abaseduzane lodaba lolu, bathe umuyi watshelwa ngumphurofethi uMutumwa ukuthi uzakufa mhlaka 15 Mfumfu, lakanye kwenzakala ngelanga elifanayo.
“UMphurofethi uMutumwa wayebhoda eziqintini zemaphandleni kuhlelo lwakhe lokufinyelela amakholwa adinga usizo ngesikhathi aze ahlangane loFanuel.
UMthunywa uxhumane lenduna uSiachilaba obike ukuba balusizi ngokulahlekelwa yindoda, loba yacetshiswa ukuthi inakelele impilo yayo.
“UMutumwa wabuya lapha wakhuluma ukuthi uFanuel uzatshona ngelanga thile aliqambayo. Umuyi wala, esithi ngeke kwenzeke ngamanga,” kubika induna uSiachilaba.
“Kwenzakala njengokubika kukamphurofethi, uFanuel wasitshiya emhlabeni ngemva kokugxotshwa yibhasi ezama ukuyigada,” kutsho induna uSiachilaba.
Iphephandaba likazulu lidinge ukujulisisa udaba ngokukhuluma lomphurofethi uMutumwa obike ukuba kuliqiniso okwenzakala eBinga.
Uvumile ukuba waphurofitha ngokufa komuntu.
“UFanuel ngamtshela ukuba kulomoya wokufa ongayisiwo omlandelayo kumele uvalwe yena wala wathi akulanto enjalo, lami ngangifisa ukuba ngimncedise aphile kodwa kwehlula,” kutsho umphurofethi uMutumwa.
Uthe wazama ukubeka imithandazo kodwa uFanuel waphetha esala ukwamukela.
“Ngenza konke okusemandleni ami ukuthi umoya lo ulahliswe. UFanuel ngamnika imithandazo lezixwayiso ngathi kayegeza ngayo ngoba yayizaxotsha imimoya emibi, kodwa yena wathi ngeke ageze ngemthandazo yami,” kutsho uMutumwa.
