uMthunywa
Ethel Ncube
ISELE ithoba amanxeba enye indoda yeDolo eMberengwa ngemva kokutshaywa ngenduku kubangwa ukuthi iqamule isikali sekhuba ebisibolekile.
Indaba le yenzakale ngeviki ephelileyo lapho uMnumzana Daniel Moyo atshaye uMnumzana Emmanuel Dziva kubangwa ukuthi uqamule isikali elima.
UMthunywa uxhumane lesinye isakhamuzi sakule indawo uMnumzana Delisani Ndlovu oveze ukuthi liqiniso ukuba ababili laba balwa bebanga isikali.
“UDziva wayeboleke isikali sekhuba sikaMoyo wathi elima ikhuba latshaya isigodo isikali sahle saqamuka.
Wasithatha esiyatshengisa umnikazi wafika wahlangana lembila zithutha.
“Wathi esikhupha esakeni umnikazi embikela wahle wadla amalangabi wathi esakhe usifuna siphelele wadobha induku wamtshaya eqolo lowana uthe evuka phansi wacela ezinyaweni watshiya lesikali sakhona khonapho,” kubika uMnu Ndlovu.
Intatheli ixhumane lesinye isakhamuzi esabona uDziva egijima ebaleka uMnumzana Qiniselani Dube oveze ukuba lindaba yenzakala.
“Indaba le nxa ilandiswa uyamangala mina ngabona uDziva edlula egijima ngamlandela emzini wakhe ngayambuza ukuthi kanti uxotshaniswa yini wathi uqamule isikali sekhuba somnikazi uthe esibisela umnikazi wamkhupha ngenduku emzini wakhe,” kuveza uMnu Dube.
Iphephandaba likazulu lixhumane lalowo owatshaywayo uMnu Dziva oveze ukuba indaba yakhe basayikhuluma.
“Okwangenza ngabaleka ngisiyamtshengisa isikali sakhe yikuthi sesiqamukile ngizathenga esinye yikuthi wathi edobha induku engitshaya ngacabanga ukuthi angacina engigamula ngokuzonda ngabona kungcono ukubaleka,” kutsho uMnu Dziva.
UMthunywa ukhulumisane lalowo owatshaya omunye ngenduku uMnu Moyo owale wemba phansi ukuthi watshaya omunye.
“Mina angitshayanga muntu ngamsikiza kuphela ngenduku yena wahle wabaleka watshiya isikali sami sekhuba siqamukile phansi,” kuphetha uMnu Moyo.
