uMthunywa
Nkosilathi Sibanda
UFIKE waba semlonyeni yabalandeli benguqu kweleBotswana ngesikhathi ethola umsebenzi kuqembu leFlamingoes, kodwa ngoMgqibelo utshayane lezihlahla.
Akuzange kube kuhle kumqeqetshi odabuka kuleli, uRahman Gumbo, ngesikhathi iqembu lakhe livula isizini yeBotswana Premier League lapho elinqotshwe nge 1-0 liqembu leNico United.
UMgqibelo odluleyo uphendule impelasonto kaGumbo yabamunyu nanko phose bonke abalandeli beFlamingoes bebebheje ukuthi loba sekutheni, umqeqetshi lo uzabanikeza injabulo kumdlalo wakuqala.
UGumbo, owaziwa ngelithi “Rush” ngabangane bakhe ebholeni, ungene kuqembu le-Flamingoes evela qeqetsha iTelOne, iqembu lakuleli elake lazama ukuligiqa enkundleni zeCastle Lager.
Ekufikeni kwakhe, uGumbo kazange aphiwe umlandu onzima, ngaphandle kokuthi agcine leli iqembu lidlala kuligi ephezulu.
Kusiya kumidlalo ezayo, uGumbo ukhangelelwe ukuthi afake ithemba kubadlali bakhe, loba laye evuma ukuthi kuzamele abaqinise ngamandla ukuze bajwayele umncintiswano wenkundla zePSL.
“Sidlala lezinkulu njalo lokho yikho okunikeza abafana bami ukuzethemba,” kutsho lumqeqetshi osewanqoba izicoco lamaqembu akuleli eBotswana laseMalawi.
Rahman Gumbo
Ngesizini yomnyaka ka2006 wanqoba iligi yeMalawi eleqembu leMTN Wanderers. KweleBotswana wanqoba leTownship Rollers.
Umqeqetshi lo, oleminyaka yokuzalwa engu-57 sowake waqeqetsha iHighlanders, Caps United, FC Platinum, Chicken Inn lezinye kumaligi aseSouth Africa, Botswana laseMalawi.
Ibhola leBotswana kuminyaka edluleyo belandise ukudlalelwa linengi labadlali abaphuma eZimbabwe, ikakhulu abavela kumaqembu akumhlubulo ongezansi yelizwe.
Iligi yeBotswana le isivuselele ibhola labanye, yaphinda yaphakamisa impilo zabo ngoba ibhadala ngcono.
Eqenjini likaGumbo kulabadlali abake badla ubhedu okukhangelelwe ukuthi balwele izicoco ababalisa owayengumgadli weCAPS United uDominic Chungwa, owake wadlalela iTelOne uMcebisi Moyo lomdlali wasesiswini uTendai Nyamusi.
Kumdlalo wokudliwa yiNico United, uChungwa wathola amathuba amanengi okuthi ahlohle iFlam Boys kodwa wayephethe ekhutha. UMcebisi laye wadlala kuhle esesiswini senkundla kodwa wakhitshwa ngumqeqetshi ngesigaba sesibili somdlalo ngoba eselimele.
