uMthunywa
Intatheli kaMthunywa
ZINATHISANA itiye izakhamizi zeHope Fountain ngemva kokuba omunye umakhwapheni echaze ubusela bendoda athandana layo ngemva kokubhaxabulwa kulandela ukutholakala elenye indoda.
UMthunywa uzwe ukuthi umakhwapheni lo, okungasatholakalanga ibizo lakhe ubethandana lendoda okutholakale ukuthi nguMathuthu nje kuphela.
Kubikwa ngeviki ephelileyo uMathuthu wafica umakhwapheni wakhe elenye indoda okwenza wacunuka wambhaxabula.
Umakhwapheni lo esetshayiwe kubikwa waqala ukutshela abantu ababebukele ukuthi uMathuthu ulehloka ahamba eliphethe ebusuku ahlasela ngalo abantu abathathele impahla zabo kukanti angahlangana labesifazana ubethusela ngalo abe sebabamba iganyavu.
Intatheli kaMthunywa ixoxisane loNkosazana Betty Mloyi uveze ukuthi lokhe bemangele ngemfihlo zikaMnu Mathuthu ezavezwa ngumakhwapheni wakhe.
“UMathuthu wafica umakhwapheni wakhe elenye indoda yena wasemtshaya kanti kabuzanga elangeni ngoba umakhwapheni lo, wahle waphuma wama phandle ememeza ethi uMathuthu ngumgulukudu wesigebenga ohamba ehlasela abantu ngehloka ebathathela impahla zabo.
“Umakhwapheni lo waphinda njalo wachaza ukuba uMathuthu uyabamba abesifazana iganyavu egangeni aphinde atshontshe lezifuyo zabomakhelwane emnika,” kuchaza uNkszn Mloyi.
UMthunywa ubikelwe njalo ukuthi udaba lolu lwabikelwa amapholisa adingisisa athola ihloka elachazwa ngumakhwapheni okwenza wabotshwa.
Isikhulumi samapholisa esabelweni seMatabeleland South ulnspector Philisani Ndebele ebuzwa ngodaba lolu uthe uzaludingisisa.
“Udaba lwendoda etshaye omunye kwavumbuluka lamanye amacala ngizaludingisisa ewofisini lapho olubikwe khona,” kuphetha uInsp Ndebele.
