uMthunywa
Nkosilathi Sibanda
SEKUCACA ukuthi ngempela uCosmas ‘Tsano’ Zulu lomqeqetshi omutsha weNgezi Platinum uErol Akbay zimbila zantabanye.
Iphephandaba likazulu likubika ngokugcweleyo ukuthi abaqeqetshi bobabili sebehlangene njalo kuleliqembu, okutsho ukuba bazasebenza bonke njengalokho ababekwenza besesekuqembu leHighlanders.
UZulu useqhatshiwe kuNgezi Platinum njengomqeqetshi omkhulu obona ngonozinti esekela umngane wakhe omkhulu uAkbay, owathola ibizo elithi ‘Mkabayi’ ekuHighlanders.
Intatheli le ithole udletshana lokuqhatshwa kukaZulu ngoMvulo waliviki kodwa iNgezi Platinum ize yaphumela igcekeni ngoLwesithathu emini ngemva kokuvumelana lengcitshi yomqeqetshi le sekuhlale isikhathi kuxoxiswana ngesivumelwano somsebenzi.
UAkbay loZulu basebenze bonke amasizini amathathu bekuTshilamoya okuyilapho abakha ubudlelwano khona.
Njengenhlayenza kunobhutshuzwayo, nxa umqeqetshi eqhatshwa, kwandise ukuthi akhethe abasekeli bakhe, lakanye uAkbay kazange alibale ukuthi ikhona indoda eyamphatha kuhle efika kuHighlanders.
Iqembu leNgezi Platinum lakhutha kancane ukuthi libeyintshantshu yeligi yeCastle Lager, okwenza kwabanzima ukuthi izikhulu zaleliqembu ziqhubeke ukusebenza loTonderai Ndiyara engumqeqetshi. Akuzange kuthathe isikhathi isizini ingakagqitshwa ukubika ukuthi sebeqhatshe uAkbay kulindawo.
Imizamo yokuxhumana lewofisi yeNgezi Platinum yehlule ngoba ngesikhathi iphephandaba labantu lidindwa, iwofisi yezokuxhumana kulithimu ibingabambeki.
Ngesikhathi umbiko wokuqhatshwa kukaZulu umemetheka, abalandeli labathandi bebhola lenyawo baveze ukuthi nguye umuntu ofunwa ngabadlali.
Omunye wabadlali beNgezi Platinum owake waba ngukaputeni wayo ukhulume wesaba ukuvezwa ibizo uthe ulethemba lokuthi uZulu loAkbay bazaletha umehluko eqenjini.
Umdlali lo uthe uZulu engenza izinto zibelula ngokwakha ubudlelwano obuhle phakathi kwabadlali labakhokheli bethimu.
“Besi sizwa ngaye uTsano kodwa nxa esengenile emsebenzini kuqembu lethu, yinjabulo lokusebenza gadalala kulisizini. Silethemba sizayithwala inkezo,” kutsho umdlali oyesabe ukuqanjwa bhadla.
