uMthunywa
Blessing Moyo
KUSEHLAKALO esithinte izakhamizi zakoBulawayo, kubikwa kulomntwana oyinkazana oleminyaka elitshumi lane yokuzalwa owathunjwa ezitolo zakoChigumira eLuveve, wadlwengulwa watshiywa emangcwabeni.
Kubikwa mhlaka 16 Mbimbitho umntwana lo wasuka ngezikhathi zantambama esiya ezitolo zakoChigumira lapho ehlelwa liyezi elimnyama, wabizwa ngomama ababili lobaba oyedwa ukuthi angene emoteni.
Ngesikhathi esengenile emoteni abetheswacala laba bambopha inyawo lezandla ngentambo yezicathulo qede bamhlaba ijekiseni engaziwayo ukuthi ngeyani, bamvala umlomo ngelembu batshayela imota yabo sebelubhekise edolobheni.
Umntwana lo waphaphama ngelanga elilandelayo ekuseni esesegangeni eliseduzane lemathuneni elokitshini leLuveve. Wazama ukusukuma, kwehlula, wasethola usizo komunye ubaba owaba nguye owamkhulula intambo ayebotshwe ngazo izandla lenyawo.
Udaba lolu lwabikelwa amapholisa, asekhiphe umbiko wokuthi aphezulu kokuchwayisisa ngalo.
“Amapholisa achwayisisa ngodaba lomntwana othunjiweyo wadlwengulwa eLuveve mhlaka 16 Mbimbitho kuwonalo umnyaka. Isizatho sokuthunjwa komntwana lowu asikatholakali,” kubika isikhulumi samapholisa koBulawayo u-Inspector Abednico Ncube.
“Kubuhlungu ukuthola ukuthi omama okumele kube yibo abavikela abantwana abangamankazana basuke labo baphatheke ebugebengwini obunje.
“Sicela uzulu ongabe elolwazi ngezigilamkhuba lezi abikele amapholisa zibanjwe zivalelwe.”
