Thokozile Mbedzi
KULENINA lakoBulawayo elileminyaka engu-34 yokuzalwa okubikwa ukuba lithunjwe ngamanina amathathu, alidakisa andubana athathe igazi emzimbeni wakhe, uMthunywa ukuzwile lokhu.
Kuzwakale ukuba mhlaka 10 kuviki ephelileyo inina leli, elihlala eMbundane lagada imota lisiya endlini yalo, eyayilamanina amathathu phakathi ayekhuluma ulimi lwesiNdebele lesiShona andubana balihlabe ngejekiseni entanyeni okwabangela ukuba lidakwe asedonsa igazi emzimbeni walo ezandleni zombili esebenzisa i-syringe andubana alidwebe ama-tatoo amabili emzimbeni.
Ekhuluma lentatheli kaMthunywa uNkosazana Peggy Dube uthe kunzima osekusenzakala emhlabeni ngoba labesifazana kabasathenjwa.
“Inina leli belilindele izimota emgwaqweni oya ePlumtree lapho okwafika khona amanina amathathu ehamba ngemota aligadisa bengani baya eMbundane.
“Bathe sebekuPlumtree Road besuka ku-15th Avenue batshintsha umgwaqo basebelihlaba ngejekiseni andubana omunye wabo alivale ngelembu ebusweni.
“Amanina la adonsa igazi emzimbeni walo besebenzisa i-syringe baqeda lapho bamcaba entanyeni langaphansi kwenkaba,” kulandisa uNkszn Dube.
Inina leli kubikwa latshiywa emgwaqweni weGwanda ku-15km peg eKensington liqulekile kodwa kabazange balithathele impahla zalo.
Inina leli lathi liphaphama lenelisa ukuyabikela amapholisa.
Isikhulumi samapholisa koBulawayo uInspector Abedinico Ncube ebuzwa ngodaba lolu uthe solufikile ehofisini yabo.
“Amapholisa adingisisa ngodaba lwenina elithunjwe ngamanina amathathu ngemva kokuba ligade imota. Sicela uzulu ongabe elolwazi aphathise amapholisa,” kuphetha ulnsp Ncube.