Ethel Ncube
KULEDLALICATSHA leMasvingo elithe ngemva kokwaliwa lasuka layathumba abantwana latshisa indlu yendoda ebelijola layo.
UChristine Maota oleminyaka engu-30 yokuzalwa kubikwa uthe ethandana loTapiwa Mhuru obelemuli yakhe wasezithwala uthe ngemva kokumbikela uMhuru wasesithi kasafuni baqhubeke ngomjolo wabo okuyikho okwathukuthelisa uMaota wayathumba abantwana wabuye watshisa indlu.
Kuzwakale ukuba umetheswala wahamba eRujeko lapho okuhlala khona uMhuru wafika watshisa indlu kungelamuntu phakathi waqeda wathumba abantwana bendoda ababili oleminyaka emihlanu loleminyaka eyisithupha.
Kubikwa abantwana laba babesele bodwa unina esekuthengiseni.
Amaloja yiwo acitsha umlilo kungakho akutshanga impahla ezinengi.
Indaba le yabikelwa amapholisa okwenza uMaota wabotshwa.
Umetheswacala usesezandleni zamapholisa, abantwana ayebathumbile labo batholakala.
Isikhulumi samapholisa eMasvingo uInspector Kudakwashe Dhewa uthe indaba le isisemthethwandaba.
“Isisemthethwandaba indaba le. Umetheswacala wetheswa icala lokubhidliza impahla lokuthumba abantwana,” kuphetha uInsp Dhewa.
