uMthunywa
YiNtatheli kaMthunywa
UBUCIKO bokucutha inkukhu kudili lokudla libuzwa kumqeqetshi weBulawayo Chiefs uThulani Sibanda.
Umqeqetshi lo usencede ukuthi iBulawayo Chiefs iqanse ibalekela ukuxotshwa kunkundla zeCastle Lager kulandela ukunqoba iChicken Inn 3-1.
IChicken Inn ibikhangelelwe ukuthi ithole yonke imiklomelo ihle ibambelele esiqongweni sengalane, ikanti ibingazi ukuthi abadlali bakaSibanda baphethe okukhulu.
Umdlalo lo utshiye iBulawayo Chiefs ikunombolo yesi-11 ilemiklomelo engu-33. AmaGamecocks abuyele muva azihlalela kunombolo yesithathu ile 53.
Kube zindaba ezinhle lezi kuqembu leCaps United eliphumelele phezulu kwesitha esidala iDynamos nge 1-0.
ICaps United leFC Platinum ziyalandelana phezulu njalo yizo zombili ezilendlela emhlophe yokuthwala inkezo yeligi ephakemeyo.
Iqembu leBulawayo Chiefs liqalise ukwenza kuhle kulandela ukuphenduka kukaSibanda phakathi laphakathi kwesizini.
Intatheli yephephandaba likazulu ikhulume loSibanda otshengisele ukujabula kakhulu.
“Ngijabulile. Sizaqhubekela phambili silwisa ukuhlala kuligi, ngakho ngibonga abalandeli kanye labakhokheli beqembu abangazange balahle ithemba kimi.
“Indlela iqembu lethu eselidlale ngayo wonke umuntu uzimisele ukuthi sinqobe singakhitshwa ku PSL,” kukhuluma uSibanda.
Intatheli iphinde yakhulumisana labanye abadlali beChiefs abagcizelele ukuba balobudlelwano labaqeqetshi babo.
“Kasithandabuzi indlela uSibanda aqhuba ngayo iqembu njalo kuyinjabulo kuwo wonke umuntu ukuthi siyanqoba,” kuchaza umdlali ophambili uKundishora Chakanyuka.
Abalandeli beByo Chiefs labo batshengisele ukuthaba ukuthi umqeqetshi uSibanda ufike waguqula iqembu.
“Ngalesi isikhathi sifuna lonke usizo esingaluthola ukuze singaphumi kuPSL ngakho kuyasijabulisa,” kutsho uTeddy “Marabha” Ncube ongumlandeli omkhulu ohlala eMinyela.
