uMthunywa
YiNtatheli kaMthunywa
YEHLELWE liyezi elimnyama imuli yakoDube koMbuso, eKezi ebisilamaviki amathathu idinga elinye ilunga layo nanko phela ifice isidumbu sakhe silenga esihlahleni.
Kutholakale isidumbu sikaMnumzana Shepherd Dube owacatsha mhlaka 22 Mpalakazi nyakenye ngoLwesithathu lweviki ephelileyo silenga esihlahleni eduze komgwaqo osuka koBulawayo usiya eMaphisa.
Ababikele iphephandaba likazulu ngalindaba bathe bakholwa ukuthi kukhona okutshaya amanzi ngokuzibophela kwakhe okuyikuthi ondofa yibo abamcatshisayo bacine bemenza ukuthi azibulale.
UMthunywa ukhulumisane loMkhumbulo Ncube oyisakhamuzi waveza ukuthi umuyi wayesithi kukhona abafuna ukumbulala engakacatshi.
“Ngilapha lakhathesi ngilokhu ngimadolonzima ngokwenzakalayo nanko phela umfowethu ngesikhathi ngihamba laye wangitshela ukuthi iKhisimusi kasoze ayidle kukhona abafuna ukumbulala nanko lakanye kayibonanga leyo Khisimusi,” kubika uMnu Ncube.
Uqhubekele phambili waveza ukuthi besebebhode izanuse labaphurofethi baze badinwa njalo konke lapho ababefika khona babetshelwa ukuthi usesekhona emhlabeni.
“Izanuse labaphurofethi bebehlala besiqambela amanga bethi uyaphila yena sowatshona kudala befuna imali. Umuyi kukhanya ngelanga ecatsha wahamba umango omfitshane wayazibophela ngoba utholakale esonakele ezibophele.
Umbuzo esilawo yikuthi intambo yokuzibophela encane kangaka yiyo eyayingambulala njani. Siyazibuza njalo ukuthi wayeselohlupho bani olwalungenza athathe impilo yakhe,” kubika uMnu Ncube.
Intatheli ibuye yaxhumana lesinye isihlobo sakoDube uNkosikazi Mbile Moyo oveze ukuthi ukufa kukamuyi kuyisimanga kibo ngoba wayengatshengiseli ukuthi ungumuntu olodubo olukhulu olwalungamenza aze azihilele.
“Samthola ezibophele ngebhanti lebhulugwe eduze komgwaqo. Kukhanya abaphurofethi babesesaba ukusitshela iqiniso ukuthi lapho akhona usefile ngoba ekucineni kwacina kuthiwa sikhuleke ukuthi abonakale ephila.
“Akuzwisiseki ukuthi ubhubhe njani, kutheni,” kutsho uNkkz Moyo.
Isikhulumi samapholisa eMatabeleland South uInspector Ndabezinhle Mkhwananzi uthe ihofisi yakhe ayikatholi umbiko ngalindaba.
