YiNtatheli kaMthunywa
KULOMHLABELELI kamaskandi ohlabela eseSouth Africa odabuka eTsholotso othole isicoco komunye umsakazo weMzansi Afrika.
Umhlabeleli lo,owazakala ngokuthi nguMthabisi Mvundla kwezomculo njalo esazakala kakhulu ngokuthi Mashiyendiya uGwajo ukhulumisane lentatheli eveza kabanzi ngomculo lokuthola isicoco sakhe.
“Mina ngaqala ukuhlabela ngo-2019 ngihlabela umculo kamaskandi ngoba yiwo umculo engakhula ngiwulalela njalo ngiwuthanda. Lokhe ngaqala ukuhlabela ngilamadlalade esengawakhiphayo amabili.
“Umculo ufuna umuntu ozinikeleyo njalo osebenza nzima ngoba kunengi esihlangana lakho endleleni okulakho ukusenza silahle ithawulo kodwa ngokuzimisela nje kuyaphutsha. Lami ngenzanjalo ngabhekana lobunzima obutshiyeneyo kodwa lamhlanje ngilapha ukuzokhuthaza abanye abahlabeleli.
“Ngiqale ukungena kumncintiswano wokuthola izicoco ngo2020, lo wawungowamaZulu kodwa angizange ngithole isicoco kuthe ngo2022 ngakhethwa kuzicoco zomsakazo we-Amaqhawenentaba ngacela abalandeli bami ukuba bangivotele bangivotela ngathola isicoco,” kubika uMashiyendiya.
Uqhubekele phambili eveza ukuba uthanda ukubonga abalandeli bakhe abamsekela ngaso sonke isikhathi njalo abenza waze wathola isicoco lesi.“Ngithanda ukubonga abalandeli bami ngokungisekela ngaso sonke isikhathi, ngiyalithanda lonke.
“Ngithanda ukubathembisa njalo ukuthi ngizabaphekela ingoma ezimnandi njalo ukuze bahlale bejabulile.
“Kubaculi abangakaze bathole izicoco zomsebenzi wabo wokuhlabela ngithi qhubekani lihlabela njalo lingadinwa ukungena kumincintiswano, kuzaze kulilungele ngelinye ilanga,”kuphetha uMashiyendiya.