uMthunywa
Ethel Ncube
KULOWESILISA wakoBulawayo osezibhalele imbali yakhe enhle ngokungena agxile kundima egcwele abesifazana yokubhaka kulandela ukuhlonitshwa ngendondo ezimbili eHarare kuviki ephelileyo.
UReverend Hermish Kajeke oseleminyaka engu-24 ebhaka amakhekhe, waqala lezikolo zokufundisa ngomsebenzi lo, uthole isicoco seCake of the Year kunye lokuba yingcitshi yokusebenzisa iFondant, esetshenziswa ekwenzeni amakhekhe emitshado.
Iphephandaba likazulu lixoxisane loKajeke obethabe emanzi te othe lokhe waqala umsebenzi lo kakaze athole indondo.
“Ngiyathaba ngosekelo engiluthola ebantwini bakoBulawayo emsebenzini wami wokubhaka. Ngithole isicoco se ‘Cake of the Year’ ngaphinda ngathola esinye futhi esokuba yingcitshi yokwenza amakhekhe emitshado.
“Ngiphenduke ekhaya lendondo ezimbili ngemva kweminyaka engu-24 ngibhaka lamuhla sengize ngahlonitshwa emsebenzini wami. Lokhu kuyangithokozisa kakhulu,” kubika uKajeke.
Uqhubekele phambili eveza ukuba abantu kumele babekezele kumabhizimusi abawaqhubayo.
“Ngifisa ukuthatha lelithuba ukukhuthaza abasaqala umsebenzi wokubhaka ukuthi ukusebenza nzima kuyabhadala.
“Loba kungakhanya angathi abantu kababoni okwenzayo kodwa wena qhubeka ucolisisa umsebenzi wakho kwelinye ilanga bazawunanzelela,” kuphetha uKajeke.
