Uncategorized

Uthengisa inyama yempisi agwetshwe inyanga ezintathu

20 Jun, 2024 - 00:06 0 Views
Uthengisa inyama yempisi agwetshwe inyanga ezintathu hyena

uMthunywa

Ethel Ncube

ZILOKHU zikhakhamele izakhamizi zeShurugwi ngesenzo senye indoda okubikwa ibihamba ithengisela abantu inyama yempisi, uMthunywa uyakuveza lokhu lamhlanje.

Kubikwa uTinashe Mhlabathi wathiya inyamazana wabamba impisi wayihlinza kuhle andubana ahambe ethengisela izakhamizi inyama le kuviki ephelileyo.

Kubikwa kulesinye isakhamuzi esaqala ukusola inyama ababeyithengiselwa sasesisiyabikela amapholisa athi esiyahlola athola ukuthi ngempela inyama eyayithengiswa nguMhlabathi ngeyempisi nanko bathola amangqina akhona.

UMhlabathi umiswe emthethwandaba weShurugwi phambi kukamantshi uPercy Mukumba esetheswa icala lokuzingela impisi njalo ugwetshwe ukuba abhadale iUS$100 kumbe ayehlala ejele inyanga ezintathu.

Umtshutshisi uTafadzwa Guzete ubike ukuba umsolwa watholakala elobufakazi bokuthi wabulala impisi. “UTinashe Mhlabathi loArtwell Mukoki ongabonakaliyo bahamba bobabili bazingela impisi ngezinja eziyisikhombisa.

Bayibamba bayihlinza bathe sebehlinzile bathengisela izakhamizi ezazingakwazi ukuthi yinyama yempisi.
“Emzini kaArtwell amapholisa athola inyawo ezine zempisi lenyama eyayingaphekwanga kodwa wathi ebona amapholisa wahle wabaleka.

“Kuthi koTinashe bathola umsila wempisi. Konke okwatholakayo kwaba yi1,95kg ikanti impisi yonke yi50kg. Okwatholakalayo kwahanjiswa eNational Parks, kubika umtshutshisi uGuzete.

Umsolwa uMhlabathi ugwetshwe ukuba abhadale iUS$100 yokuvuma icala, nxa engenelisi uyakuya ejele inyanga ezintathu. Ukhangelelwe njalo ukuthi abhadale iUS$1 000 kuZimbabwe Parks and Wildlife Management.

Share This:

Sponsored Links

Survey


We value your opinion! Take a moment to complete our survey

This will close in 20 seconds