UKUHAMBA kwemvimbi enguTeenage Hadebe isiyadlala eTurkey sekutshiye iKaizer Chiefs itshaywa likhanda elinzima.
Kubikwa leliqembu sekumele liphangise ukudinga abadlali abangavala indawo yalumdlali isizini isisondela.
Umbuzo omkhulu yikuthi kubadlali abathathu abaseleyo yibaphi ababili abazaxotshwa njalo ngu-Ernest Middendorp.
Njengamanje iChiefs ilabadlali abayisitshiyagalombili emabhukwini ayo abaphuma kwamanye amazwe. Inkinga yikuthi kumele ikhethe abahlanu ezababhalisela kusizini entsha.
Umthetho wePremier Soccer League (PSL) uthi iqembu lingabhalisa abadlali abahlanu kuphela abangazalwa eNingizimu Africa. UWillard Katsande loKhama Billiat sebehlale ngokwaneleyo eSouth Africa okokuthi sebengabhaliswa njengenzalo yeNingizimu Africa.
Lokhu kubangela ukuthi uLeonardo Castro, Dax Andrianarimanana loDaniel Akpei bahlale bejeqeza. Imbangela yalokhu yikuthi uHadebe uselekhaya elitsha eTurkey kanti uLazarous Kambole, James Kotei loSamir Nurkovic kusobala ukuthi bazobhaliswa, basayiniswe muva nje.
UKearyn Baccus ngowase-Australia kodwa ngokuzalwa uphuma eThekwini okumenza abhaliseke njengomdlali we-South Africa.
Konke lokhu kubenza bahlale beqalaza o-Akpei obeku-Afcon leNigeria, uDax naye obeku-Afcon leMadagascar loCastro osekuvele kanengi ukuthi iChiefs ihlela ukumfaka oluhlwini lwabadlali abathengiswayo.
Kusengenzeka futhi bagcine behamba bobabili u-Akpei loCastro ngoba lasekupheleni kwesizini edluleyo uMiddendorp ubengafihli inhloso yakhe ngalaba abadlali.