uMthunywa
YiNtatheli kaMthunywa
U-OBADIAH Tarumbwa engabe elesifiso sokuthi azoqedela umdlalo wakhe kuqembu leHighlanders kodwa abalandeli beqembu bathe akakhohlwe.
Kuvele amahemuhemu okuthi uTarumbwa, owake wadla ubhedu esatshibilika kuBosso ubike ukuba usefuna ukuzodlala kuleliqembu elamakhela ibizo.
Abafakazi abaqotho abaseduzane lomdlali lo bazise uMthunywa kuliviki ukuthi kuliqiniso ukuthi lumdlali olonyawo olutshisayo nxa kusiza kwezokuhlohla, useduzane lokudlalela iHighlanders nanko phela kubikwa labakhokheli baleliqembu bayawukhwabitha umdlalo wakhe.
Abafakazi abaqotho laba bancwebe uMthunywa indlebe babika ukuba uTarumbwa obegijima kuTalen Vision ezikwakweni, ngesizini edluleyo, usebalelwa kubadlali abathile asebebonwe yiziphathamandla. Phakathi kwabadlali laba kulabathathu abavela kuqembu leBosso 90 uDarlington Mukuli, uDominic Jaricha loDalubuhle Dlodlo.
Ukuphuma kwalumbiko uze ufinyelele iphephandaba likazulu kuza kulandela isimemezelo sokuba bakhona abadlali abasebefulathele iBosso.
UMcClive Phiri ulubhekise kweleSouth Africa kuliviki esiyazama inhlanhla kuBidvest Wits. Umdlali lo ngomunye njalo ofunwa ngumqeqetshi we-Chicken Inn uJoey Antipas. Lumqeqetshi wakubika emphakathini ngoMfumfu ukuthi isifiso sakhe kulisizini yikuthi athole imvimbi kuzwa yeBosso uPeter Muduhwa.
Ngendlela iHighlanders edinga ngayo umgadli, kuveza ukuthi uTarumbwa uzangena ngesivuvu. Kodwa lokho akujabulisi abalandeli baleliqembu.
UKwanele Sihlobo oweCowdray Park ubike ukuba akusizi ukubuyisela ithalenta elidala.
“UTarumbwa wadlala kwedlula. Asinikezeni abadlali abasakhulayo ithuba. Iqembu kumele liyephambili kodwa singathi siqine ngokuthatha laba abadlali asebekhulile, angiboni sisiba lempumela enhle.”
UDaniel Nkomo oweSilobela uthumele umbiko esithi uTarumbwa ngumdlali osewaphelelwa ngumphako.
“Akusela lutho laphana. Icebo lokubiza umfana lo ngelokuwisa iqembu.”
Umfakazi othembekileyo oseduzane leBosso wazise ukuba kusukela ngeviki edluleyo, besezitshisa inkulumo phakathi kukaTarumbwa leziphathamandla, emahofisini eqembu.
“Yebo, lumfana uObadiah Tarumbwa kungenzeka angene emzileni wokuya kuHighlanders. Uphethwe emlonyeni yabadala kodwa akwaziwa ukuthi kuzaphetha ngani.
“Bonke bayamfuna lumdlali, akufihlwa lokhu. Kudingwa umuntu ohlohlayo kuHighlanders, ngakho umdlali onjengoTarumbwa engabasukumisa abalandeli ngokuhlohla,” kutsho umfakazi lo othembekileyo.
UMthunywa uzwe ukuba inyembezi ziyakhithika kuTarumbwa encenga ukuphenduka ekhaya.
Ebuzwa mayelana ngalokhu, uTarumbwa ngoLwesibili ulandule waze wemba phansi, engazi ukuthi uMthunywa ulibambile iqiniso.
Ucingo lukaRonald Moyo isikhulumi seBosso belungabanjwa ngesikhathi efonelwa.
