uMthunywa
Nkosilathi Sibanda
KULEMPI yenguqu ezwayo kumdlalo weCastle Challenge Cup phakathi kweFC Platinum leBulawayo Chiefs, eMandava ngoMgqibelo.
Lo ngumdlalo osuchazwe ngokuthi udibanisa umbalisi lomfundi wakhe ngoba umqeqetshi weBulawayo Chiefs uLizwe Sweswe wayengumsekeli kamqeqetshi weFC Platinum uNorman Mapeza.
FC Platinum
Ukubambana kwabaqeqetshi laba kwenza iFC Platinum yaba yinkunzi yomdlalo kanobhutshuzwayo kuligi ephakemeyo kuleli. Basebenza bonke bathwala inkezo yeligi yeCastle Lager kathathu, ngo-2017 lo2018. Ngokusuka kukaMapeza ngesizini ka-2019, uSweswe waqhubeka wayithwala inkezo leqembu elifanayo.
NgoMgqibelo, bobabili bahlangana sebeyizitha.
uLizwe Sweswe
USweswe ubike ukuba kayiboni ngaleyondlela. Utshele iphephandaba likazulu ukuba ulungise iqembu elijonge ukunqoba.
“Umdlalo wenguqu unjalo. Ngumdlalo esiwulanda siwulungiselele. Kusukela ngelanga lakuqala, bekusebenzeka labadlali bami.
Sibelamaviki afika isithupha sibumba, silolonga. Ngalesi isigaba lathi siyazethemba ukuthi sesikulungele ukuthi sihambe siyedlala,” kutsho uSweswe.
USweswe kuyaziwa ukuba umhlonipha okukhulu uMapeza njengomqeqetshi owamnikeza ithuba lokuthi asebenze kunkundla eziphezulu esuka kuTsholotsho FC.
iBulawayo Chiefs
Umdlalo weCastle Challenge Cup lo, ngokukhuluma kukaMapeza, uqakathekile ngoba uzaveza ukuthi iqembu lakhe liqine kanjani, andubana kuqale isizini.
“Ngumdlalo obalulekileyo kithi,” nguMapeza lo.
“Ngibona angathi kuzaba yinto enkulu nxa abafana bami benganqoba. Lo ngumdlalo ozangibonisa izinga esikulo kumalungiselelo ethu eligi.”
Kusenjalo, ababukeli bazathi ukubhadala imali ephansi kulumdlalo, ngokubika kwenhlanganiso yePremier Soccer League.
“Itikiti elitshiphileyo lizabiza iUS$2. Indawo ye-VIP izakuba yi-US$5,” kutsho isikhulumi sePSL uKudzai Bare kumbiko othunyelwe intatheli kuliviki.
Uthe abantwana besikolo bazabhadala US$1.
