Ususondele Umcimbi Wabantu

05 Sep, 2019 - 00:09 0 Views
Ususondele  Umcimbi Wabantu UDr Malinga

uMthunywa

Bongani Ndlovu

ZIWULINDELE ngamehlo abomvu izakhamizi zakoBulawayo umcimbi omkhulu wabantu ozakwenzelwa eCity Hall Car Park ngoMgqibelo ebusuku.

Umsakazo wabantu wakoBulawayo oweSkyz Metro lonyaka wenelisa iminyaka emithathu njalo uzaqhuba umkhosi lo kusukela ngehola lika6 ntambama kuze kuse.

Njengenhlalayenza umphakathi usulindele usuku lwangoMgqibelo lapho okuzahlangana khona abahlabeleli abehlukeneyo abakuleli lakweleSouth Africa kumcimbi odume ngokuthi Umcimbi Wabantu.

Ekhuluma lentatheli uRosemary Tshuma ogumlandeli womsakazo lo uthe kaselakho ukuzibamba emoyeni.
“Mina kusukela umcimbi wokuqala angikaze ngeqise ukuya emcimbini wabantu ngiyathokoza khathesi ngoba sekusele amalanga ambalwa kuphela.

“Into enhle ngomcimbi wabantu yikuthi usilethela abahlabeleli bakuleli okwenza ukuba lathi njengabalandeli sikwazi ukuthola uthando labahlabeleli bakithi, lokugida kuze kuse,” kuchaza Tshuma.

Omunye wabalandeli beSkyz Metro uthe yena unguLoveday Nkomo uthe ubuhle bomcimbi yikuza kwabadlali bangaphandle kwelizwe.

“Mina lonyaka angekeli ukuhamba emcimbini wabantu ngoba kubuya uDr Malinga njalo ingoma zakhe ngiyazithanda kakhulu ngethemba akusimi ngedwa abamhuge ngokubuya kwakhe eCity Hall,” kutsho uNkomo.

Intatheli kaMthunywa ibuye yakhuluma lomaneja weSkyz Metro uGoodwin Phiri othembise abantu ukuba lonyaka iZesa izakuba yi-backup.

“Ngemva kokucitshwa kwamagetsi ngomnyaka odlulileyo silamaSololo, lonyaka sikubone kungcono ukuba sibe lama-generator ukuze singakhali ngokucitshwa kwamagetsi,” kuveza uPhiri.

Uqhubekele phambili waveza ukuba abantu bengabuyi bethwele imphako yaphandle ngoba konke kukhona.

“Kulabo abazabe bekhona sithanda ukulibikela ukuthi konke kuzabekukhona mhla womcimbi. “Ukudla kanye lokunathwayo kuzakube kukhona kuthengiswa ngalolosuku kungakho okudingakalyo yikuthi umuntu athenge itikiti lakhe nje alubhekise kulumcimbi,” kuchaza uPhiri.

Share This:

Sponsored Links