uMthunywa
Nkosilathi Sibanda
NGESIKHATHI isizwe sithwele nzima ngokulwisana lezidakamizwa esezibhidlize impilo yabasakhulayo, umdlali wenguqu weqembu leZPC Kariba ubanjwe elomxhaka wemihlobo etshiyeneyo yezidakamizwa endlini yakhe.
Kubikwa ubotshwe ngoLwesibili ntambama ngamapholisa ogatsha lwe-Criminal Investigation Department (CID) eKariba.
Isikhulumi samapholisa elizweni lonke u-Assistant Commissioner, Paul Nyathi ukuqinisekisile lokhu.
uAssistant Commisioner Paul Nyathi
“Mhlaka 1 Nkwenkwezi, amapholisa eCID athole udletshana, asuka lapho ayadingisisa abopha umdlali weZPC Kariba Football Club, uMango Winston Mululasoni (35), owaziwa ngelinye ibizo elithi Bagga. Ubotshelwe ukutholakala lokuthengisa izidakamizwa,” kutsho u-Asst Comm Nyathi ekhuluma lentatheli.
Kubikwa amapholisa athola uMhango elembanje eziyisilinganiso se-4,7 kilogrammes, imbodlela ezingu-11 zama-100ml zomuthi wokukhwehlela iBenylin, iCodeine, lembodlela eyodwa eyeBronCleer.
IBronCleer
IBronCleer le-Codeine le yizo izidakamizwa ezidume ngebizo elithi “ingoma”.
Amapholisa achaze ngaloludaba kukhasi leTwitter, i-@PoliceZimbabwe, lapho athe: “Kutholakale i-Codeine, amapulasitiki okupakitsha, izikali ezisetshenziswa emkulwini ezimbili ezohlobo lwe-Digital scale lamaphepha okugoqela imbanje.
FC Platinum
UMhango uke wadlalela iqembu leHighlanders, kodwa wesulwa eqenjini ngesizini edluleyo. Wadlala kuFC Platinum leqembu lakibo eleHwange, andubana ayezama inhlanhla kuqembu leKabwe Warriors eZambia.
Umdlali lo ubotshwe nje esanda kutshada lesithandwa sakhe sakudala uPrimrose Sibanda.
Ukubotshwa kwalumdlali elezidakamizwa kungabe kungumzekeliso wokuthi inengi labadlali liyaphatheka kuzidakamizwa. Sekukanengi abaqeqetshi bekhalaza ngokuthi ithalenta labadlali babo liqedwa yizidakamizwa lotshwala.
