uMthunywa
Musa Janga
KULEMULI yeTsholotsho esigabeni sakoNgqoya ekhalalele omunye usobhuku isidumbu ngemva kokuba ekhulume kubi emngcwabeni edakiwe.
Kubikwa isiga lesi senzeke ngoLwesihlanu olwedluleyo lapho umngcwabo kagogo uMaNgwenya ophose wangasaphumeleli ngemva kokuba usobhuku wesigabeni uMnumzana Durban Sibanda ethe imuli yakogogo uMaNgwenya ayilamadoda, uzwela ugogo ongcwatshwa ngabantu abangayisibo madoda.
Ekhuluma lentatheli kaMthunywa uMnumzana Davis Tshuma ongumnewabo kagogo uMaNgwenya ubike ukuthi isenzo sika sobhuku asilunganga njengomphathi wesigaba.
“Abantu abanjengabo sobhuku kumele kube yibo ababa yizibonelo ezinhle emphakathini ngakho nxa bona besenza njengalokhu okwenziwe nguSibanda kuzaba yisigaba bani?
“Usobhuku ubuye emngcwabeni edakiwe wakhuluma izinto ezingayisizo ethi ugogo uMaNgwenya waze wangcwatshwa ngabantu abangayisiwo madoda, imuli le igcwele abantu abangayisibo madoda, ehleka. Kunengi akukhulumileyo ekhuluma izinto eziyangisayo emphakathini yingakho sikhalalile ukuthi yena amngcwabe njengoba eyiyo indoda yakhona.
“Yiloba sicine simngcwaba udadewethu akusijabulisanga lokhu, ngezake ubuye emngcwabeni udakiwe wena usazi ukuthi kuzamele kube nguwe okhulumayo njengomphathi wesigaba,” kulandisa uMnumzana Tshuma.
Omunye wezakhamizi ongathandanga ukuvezwa ngegama ubike ukuthi uSobhuku lo uvele ehlala ekwenza ukuthi ezimfeni ucina engenelisi ukukhuluma kuhle ngenxa yokuthi utshwala buyabe busekhanda.
“USibanda uhlala ebuya ezimfeni edakiwe abesekhuluma izinto ezingalunganga. Uyabe ungasakwazi ukuthi butshwala kumbe vele kuyabe kuyinto ahlala efuna ukuyikhuluma abesevala ngotshwala. Engakhuluma kubi uyabona kusasa ekuseni esezoxolisa ngoba uyabe esezisola,” kulandisa isakhamuzi lesi.
Imizamo yokuxhumana loSobhuku uDurban Sibanda yehlule ngoba ucingo lwakhe lungatholakalanga.
