uMthunywa
Thokozile Mbedzi
KULOSOBHUKU weDombodema kuWadi 13 esigabeni senduna uMpini owenze ihlazo nanko phela uhlahlele umkakhe ngehloka kathathu esiphundu wafa ngemva kwalokhu wangcwaba isidumbu sakhe emasimini kubangwa ukuthi umtshelelani ngokufunakalayo emzini wabo ngeviki ephelileyo.
UMnumzana Khomba Foreman Sibanda oleminyaka engu-74 yokuzalwa uhlahlele umkakhe u-Teppy Sibanda oleminyaka engu-66 yokuzalwa kathathu ngehloka wahle wafa kubangwa ukuthi umfazi ukhulumelani ngendingeko zemzini wabo.
Ngemva kokubulala umkakhe kubikwa umsolwa ufihle isidumbu emasimini sazotholakala ngemva kokuba abantu sebenanzelele ukuthi uNkosikazi Sibanda kabonakali.
Exhumana lentatheli kaMthunywa uNkosazana Lindiwe Moyo ongumakhelwane uveze ukuthi lokhe bengela mandla ngesehlakalo lesi njengezakhamizi njalo sebesesaba omkabo.
“Kangilawo amandla okukhuluma ngilapha ngesehlakalo esisehleleyo njengezakhamizi zalapha, kambe abantu abadala asebeluphele babulalane kabuhlungu kangaka. Mfundiso bani abayihlanyela kuntsha. UMnumzana Sibanda uyangisile njalo lokuthi ngithi Mnumzana akumelanga ngoba uyisinengiso emphakathini.Abantu abadala baze behlule
“Vele uSibanda akumangalisi, wayevele elochuku kunkosikazi wakhe lamuhla nanko sokusitshiyele ihlazo elingaka esigabeni. Lokhu akusikho kwezihlobo zabo kuphela kodwa isigaba sonke, sokuyisithuko somuntu wonke lapho azakuya khona.
“Kambe umuntu aze abulale umkakhe ngoba umtshele ngokufunakalayo emzini wakhe kutshoni khonokho. Angithi yiwo umsebenzi kababa ukuthenga konke okufunakalayo. Ngezinye indlela kuveza ukudelela isifazana kukanti emasikweni ethu akusikho lokhu isifazana besihlonitshwa njalo lasibi sawo amakhosi ebesihlonipha isifazane hatshi lokhu esesikubona. Ngikholwa umthetho uzamjezisa ngoba sibonga ukuthi uhle wabotshwa, kutsho uNkszn Moyo.
Omunye wezakhamizi uMnumzana Henry Dube uthe yena lokhu ezibuza ngesihluku lesi njalo uyakholwa ukuthi uMnumzana Sibanda uhlungiwe ngoba akula ukuthi lokhu ukwenze yedwa.
“Mina ngokwami ngikholwa ukuthi uSibanda uhlungiwe ngoba phela abantu balomona. Loludaba lusehlise isithunzi njengobaba njalo zonelwa mvu yinye, sesizahlala nzima emakhaya ngoba labantwana sebezasesaba ngoba kangiboni ukuthi kulomtwana lapha esigabeni sethu osezakhululeka engezwa ubaba esekhweze ilizwi. Sokusikhuphe ukuthembakala njengobaba lesithunzi sonke.
“Okunje kasikuvumeli emphakathini lanxa kuphambaniseke kangakanani, abantu kabakhulume konke ngomlomo balungisise lapho okonakele khona ngesihle. Lami njengobaba angiluvumeli udlame olunje, sekumele sikhuthazane njengabobaba besigabeni ukuba sixoxisane siqondisane singaphetha umsebenzi lo ukuze siyephambili ngempilo njalo sihlale ngokuthula,” kutsho uMnu Dube.
Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uvumile wathi solufikile ehofisini labo njalo bakhuthaza uzulu ukuthi abikele abaphathi babo lamapholisa lapho nxa besuke baba lohlupho bengazwisisani.
“Udaba lwendoda egamule umkayo wafa solufikile ehofisini lethu njalo uzulu kumele azise amapholisa loba abaphathi bezigaba nxa belohlupho ukuze ukulahlekelwa ngumphefumulo okufana lalokhu singabi lakho,” kuphetha uInsp Ndebele.
