uMthunywa
YiNtatheli kaMthunywa
UKUSILELA kwempahla yomdlalo wokugijima kuzikolo zeMatabeleland North sekuhuge omunye wabosomabhizimusi bakoBulawayo ukuthi ancedise lesi isabelo ukuze abantwana abalethalenta baye phambili kulumdlalo.
Lokhu kuza ngemva kokuphuma kodaba kuleliphephandaba kumaviki amabili lapho okwabikwa ukuba iMat North ihlala isekucineni kumincintiswano ngoba idubeka ngempahla langenkundla ezifaneleyo kwezemidlalo.
Ngokuzwa ngesimo sezikolo, inkampani eyaziwa ngokusebenzelana lezikolo eMat North, eye-Zero Supplies ibambane lenhlanganiso yeNational Association of Primary Heads (Nash) ngokunikeza impahla yokugijima kuzo zonke izigaba zakulindawo.
Impahla le, ebalisa izigqoko zokugijima kubikwa izasetshenizwa kumkhosi wezigaba ozaqhutshelwa eFolosi ngenyanga ezayo.
Kumbiko othunyelwe iphephandaba likazulu, inkampani yeZero Supplies ithe izanikeza impahla le ekupheleni kwaliviki edolobheni leHwange.
“Ngenxa yosekelo esiluthola kuzikolo zesabelo esikhulu seMatabeleland North kubhizumusi lethu, sikubone kufanele ukuthi lathi sisekele ezemidlalo. Ngokunjalo, kuliviki sizanikeza impahla yomdlalo wokugijima kuzo zonke izigaba eziyisikhombisa zeMat North,” kutsho lumbiko.
Umphathi wezemidlalo kuNaph eMat North uJames Daka ubike ukuba ukuzwanana kwezikolo lamankampani afana leZero Supplies kuzaphathisa ekhuliseni umdlalo wokugijima.
“Okwenziwe yinkampani le lamanye aqhubeka esincedisa kuyisitshengiselo sokuthi umphakathi usekela ithalenta lezikolo. Umdlalo wokugijima uzakhula esikolo zeMat North, kungaqhubeka kulobudlelwano obunje.”
Isabelo seMat North sibalelwa phansi nxa siqathaniswa lezinye kwezemidlalo. Minyaka yonke iqembu elimela lesi isabelo lihlala lisemuva emincintiswaneni yokugijima. Kungumbono wabaqeqetshi bezigaba ukuthi usekelo olufana lolwe-Zero Supplies lungaqhubeka, lonyaka iMat North izakwenza ngcono ekugijimeni.
Kudaba olwancedisa ukuthi kuqhutshwe impahla le, umqondisi weZero Supplies uClemence Kunzekweguta wabika ukuba kasoze adinwe ngokusekela ithalenta labantwana.
“Siyajabula ngokuthi isizini yomdlalo wokugijima isifikile. Sijabuliswa yikuthi sincedisana lezikolo ezisemaphandleni. Inkampani yeZero Supplies ayithandabuzi ukubika ukuba lonyaka ikhona njalo izasekela ngemvuzo kumncintiswano wokugijima ezabalweni zeMatabeleland.
“IZero Supplies ilinde ukusekela ithalenta lezemidlalo ngaso sonke isikhathi,” kutsho uKunzekweguta.
