YiNtatheli kaMthunywa
IZAKHAMIZI zeNew Lobengula zibambane ndawonye zidinga umfana olahleke ngemva kokuthathwa ngamanzi ngesikhathi kusina izulu, ngoLwesibili.
Ngemva kwesikhathi esingaba lihola elilodwa, umzimba womfana lo, obeleminyaka emithathu yokuzalwa, ubonwe ngesinye isakhamuzi ebesikuqula lalabo abakade bemdinga. Isakhamuzi lesi kubikwa sibone unyawo lomfana luthutsha phakathi kweganga, okuyikho lapho okubonakale umzimba.
Umfana lo ulahleke ngesikhathi ehamba lomnewabo oleminyaka eyisitshiya galombili yokuzalwa. Umuyi lomfowabo babethunywe ngunina ukuyathenga okuthile esitolo esincane esikulindawo. Sebephenduka, beqonde ngekhaya, yikho lapho lo omncinyane athathwa khona ngamanzi.
Isikhulumi samapholisa koBulawayo, u-Assistant Inspector Nomalanga Msebele, kumbiko wakhe ngesehlakalo lesi, uthe umntwana odlule emhlabeni nguSibusiso Methembe Moyo.
Ngesikhathi izakhamizi, ezifika eziyisitshiya galolunye, ezingobaba, zikhipha umzimba, kube labantu abanengi abaqalise ukufika kulindawo, udaba selusabalala.
Kubizwe amapholisa, afike adlulisela umzimba womfana esibhedlela seMpilo ukuyahlolwa.
“Sekele ukudinga ngehola letshumi ebusuku ngoba besekumnyama. Siphinde saqhubeka ukudinga ekuseni. Besivumelana ukuthi umzimba womfana ubungeke uhambe lamanzi khatshana lalapho athethwe khona,” kutsho uMnumzana Love Dube, oyisakhamuzi njalo elilunga leBulawayo Progressive Residents’ Association
Esinye isakhamuzi, uMnumzana John Oka uthe:
“Besisesaba ukuthi mhlawumbe isidumbu sakhe sikhukhulelwe ephayiphini enkulu engaphansi komgwaqo kaLuveve Road.
“Kukhanya amanzi amkhafulele eceleni kwesifudlana, umzimba wabanjwa lihlathi.”
Umfowabo kubikwa wagijima wayabikela unina ngokwenzakeleyo.
U-Assistant Inspector Msebele uxwayise abazali ukuthi bakhangelisise ukuhamba lokudlala kwabantwababo ngesikhathi sokuna kwezulu.
“Sikhuthaza abazali lalabo abagcine abantwana ukuthi bahlale beqaphele abantwababo njalo babaxwayise ukuthi bangachaphi izifudlana ezigcwele amanzi,” kutsho uAsst Insp Msebele.
